សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: កម្លាំងនគរបាលខណ្ឌសែនសុខ ដឹកនាំដោយលោកវរសេនីយ៍ឯក ម៉ក់ ហុង អធិការនគរបាលខណ្ឌ បានឆ្មក់ចុះបង្ក្រាបតាមច្រកផ្លូវតូចមួយកន្លែង កាលពីវេលាម៉ោង១១ និង៣០នាទីព្រឹក ថ្ងៃទី១៦ ខែមីនា ឆ្នាំ២០១៧ នៅខាងមុខផ្សារហេងលី តំបន់ត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ដោយឃាត់ជនសង្ស័យប្រុសស្រីចំនួន៥នាក់ និងគ្រឿងញៀនមួយចំនួនតូច ។
លោក អធិការនគរបាលខណ្ឌសែនសុខ បានប្រាប់ឲ្យដឹងថា ជាលទ្ធផលក្នុងការចុះបង្រ្កាបនេះគឺកម្លាំងរបស់លោកបានឃាត់ខ្លួនជនសង្ស័យចំនួន៥នាក់ក្នុងនោះមាន ស្រីចំនួន២នាក់ និងគ្រឿងញៀនប្រភេទក្រាមសថ្លា ១កញ្ចប់តូច នៅក្នុងរោងតាមផ្លូវតូច តំបន់ត្រពាំងឈូក ស្ថិតនៅភូមិបុរីកម្មករ សង្កាត់ទឹកថ្លា ខណ្ឌសែនសុខ និងបាននាំយកទៅពិនិត្យរកសារធាតុញៀនផងដែរ។
លោកបានបន្តទៀតថា ចំពោះតំបន់ត្រពាំងឈូកគឺជាចំណុចក្តៅត្រូវបោសសម្អាតនិង ទប់ស្កាត់ មិនឲ្យមានរូបភាពជួញដូរប្រើប្រាស់ យ៉ាងអនាធិបតេយ្យកើតឡើងដូចមុនឡើយ។ជាមួយនេះដែរកម្លាំងយើងបានបង្កើតទីបញ្ជាការស្រាល ដោយផ្លាស់ប្តូរកម្លាំងយាមកាម២៤ម៉ោងលើម៉ោង ដើម្បីឆែកឆេរ មិនឲ្យមានការចរាចរណ៍គ្រឿងញៀនបានឡើយ។
បច្ចុប្បន្នជនសង្ស័យទាំង៥នាក់រួមទាំងវត្ថុតាងគ្រឿងញៀន១កញ្ចប់តូច ត្រូវបានសមត្ថកិច្ចនាំយកទៅឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌសែនសុខ ដើម្បីត្រួតពិនិត្យទឹកនោមហើយ បើពិនិត្យឃើញថាមានគ្រឿងញៀនមែនពួកគេនឹងត្រូវបញ្ជូនទៅអប់រំនៅមជ្ឈមណ្ឌលកែប្រែបន្សាបក្រឿងញៀន ៕ តុង សីហា
