សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ដើម្បីអបអរសារទរពិធីបុណ្យចូលឆ្នាំថ្មីប្រពៃណីជាតិខ្មែរ និងបង្កអោយមានភាពសប្បាយរីករាយដល់បងប្អូនប្រជាពលរដ្ឋនោះ នៅខេត្តស្វាយរៀងតែងតែប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរនៅក្នុងខែមេសា ជារៀងរាល់ឆ្នាំផងដែរ។
បើតាមមន្ត្រីសាលាខេត្តបានឲ្យដឹងថា នេះជាលើកទី១ហើយដែលខេត្តស្វាយរៀងបានរៀបចំសង្ក្រាន្តស្វាយរៀងដែលរៀបចំកម្មវិធីនេះឡើងដោយសហភាពសហព័ន្ធយុវជនកម្ពុជាខេត្ត និងសហការជាមួយរដ្ឋបាលខេត្តស្វាយរៀង។
មន្ត្រីដដែលបន្តថា ក្នុងការរៀបចំសង្ក្រាន្តស្វាយរៀងគឺមានចំនួន៥កន្លែងដែលមានរយៈពេល៣ថ្ងៃចាប់ពីថ្ងៃទី១៤-១៥-១៦ ខែមេសា ឆ្នាំ២០១៧ក្នុងនោះ ក៏មានលេងល្បែងប្រពៃណីជាតិមានការ រាំកំសាន្តផងដែរ។
មន្ត្រីរូបនេះបញ្ជាក់ថា ក្រោមការដឹកនាំរបស់អភិបាលខេត្តស្វាយរៀងក៏មានការរៀបចំដាក់អំពូលភ្លើងនៅតាមដងផ្លូវមួយចំនួនក្នុងក្រុងស្វាយរៀងដើម្បីលំអរសោភណ្ឌភាព ជាពិសេសការរៀបចំសួនច្បារការជួសជុលដាក់ឥដ្ឋការ៉ូឡានៅតាមចិញ្ចើមថ្នល់ខាងមុខសាលាខេត្តនៅមុខមន្ទីរពេទ្យនិងតាមដងផ្លូវផ្សេងៗមួយចំនួនទៀត។ ចំណែកសន្តិសុខសណ្តាប់ធ្នាប់ក៏មានការរៀបចំបានល្អប្រសើរផងដែរដើម្បីធានាបានសុខសុវត្ថិភាពជួនបងប្អូនប្រជាពលរដ្ឋនាឱកាសបុណ្យចូលឆ្នាំថ្មីនាពេលខាងមុខនេះ៕ យឹម សុថាន
