សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសពីរនាក់ខណៈផឹកស្រវឹងខ្លាំងវង្វេងស្មារតីបានជិះម៉ូតូមួយគ្រឿង រេចង្កូតទៅបុកខឿនចិញ្ចើមថ្នល់ រងរបួសធ្ងន់ទាំងពីរនាក់កាលពីវេលាម៉ោង ១០និង៥០នាទីយប់ ថ្ងៃទី ១៨ ខែមេសា ឆ្នាំ២០១៧ ត្រង់ចំណុចមុខផ្សារហេងលី តាមបណ្ដោយផ្លូវលេខ២៧១ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក ។
តាមប្រភពពត៌មានពីនគរបាលប៉ុស្តិ៍ទឹកល្អក់ទី៣ បានឲ្យដឹងថា មុនពេលកើតហេតុ គេឃើញបុរសមិនស្គាល់ឈ្មោះនិងអាសយដ្ឋានពីរនាក់អាយុស្របាលៗគ្នាក្នុងខ្ទង់ជាង៣០ឆ្នាំបាន ជិះម៉ូតូមួយគ្រឿង ម៉ាកស្កូបពី ពណ៌ស ពាក់ស្លាកលេខ ភ្នំពេញ 1BG ៩៤៦៥ ឌុបគ្នាធ្វើដំណើរតាមផ្លូវលេខ២៧១ ក្នុងទិសដៅពីស្ពានអាកាស ស្ទឹងមានជ័យទៅស្ពានអាកាស៧មករា ក្នុងស្ថានភាពស្រវឹងទាំងពីរនាក់។ លុះមកដល់មុខផ្សារហេងលី ស្រាប់តែអ្នកបើកម៉ូតូ បានរេចង្កូតទៅខាងស្ដាំ ហើយជ្រុលទៅបុកខឿន ចិញ្ចើមផ្លូវមុខផ្សារហេងលី បណ្ដាលឲ្យ រងរបួសធ្ងន់សន្លប់ឈឹងទាំងពីរនាក់តែម្តង ។
ភ្លាមៗនោះនគរបាលមូលដ្ឋានទៅដល់បានទាក់ទង ទៅកាន់រថយន្តសង្គ្រោះបន្ទាន់ របស់គ្លីនិកឯកជន ដើម្បីមកដឹកជនរងគ្រោះ យកទៅសង្គ្រោះនៅគ្លីនិកម្នាក់ និងទៅមន្ទីរពេទ្យកាល់ម៉ែតម្នាក់ ។ ចំណែកម៉ូតូ ត្រូវនគរបាលប៉ុស្តិ៍រក្សាទុកឲ្យសាច់ញាតិមកទទួលយកត្រឡប់ទៅផ្ទះវិញ ៕ ប្រាថ្នា
