សមត្ថកិច្ចឃាត់មនុស្សប្រុសស្រី៦នាក់ករណីប្រើប្រាស់គ្រឿងញៀន

ភ្នំពេញ៖ មនុស្សប្រុសស្រីចំនួន៦នាក់ ត្រូវកម្លាំងនគរបាលព្រហ្មទណ្ឌខណ្ឌសែនសុខ សហការជាមួយនឹងនគរបាលប៉ុស្តិ៍ទឹកថ្លាឃាត់ខ្លួន ខណៈពួកគេបាននាំគ្នាទៅប្រមូលផ្តុំប្រើប្រាស់គ្រឿងញៀន។

ការឃាត់ខ្លួននេះបានធ្វើឡើងកាលពីវេលាម៉ោង១១និង៣០នាទីព្រឹក ថ្ងៃទី២២ ខែមេសា ឆ្នាំ២០១៧ ស្ថិតនៅចំណុចផ្ទះសង់ថ្មី ផ្លូវបេតុង ភូមិស្លែងរលើង សង្កាត់ទឹកថ្លា ខណ្ឌសែនសុខ។

សមត្ថកិច្ចឲ្យដឹងថា ជនសង្ស័យទាំង៦នាក់នេះទី១ មានឈ្មោះ ហៀង ចាន់ថន ភេទស្រី អាយុ២៩ឆ្នាំ មុខរបមិនពិតប្រាកដ ស្នាក់នៅបន្ទប់ជួលភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។ ទី២ឈ្មោះ ហ៊ុត លីហ្សា ភេទស្រី អាយុ១៧ឆ្នាំ មុខរបរមិនពិតប្រាកដ ស្នាក់នៅម្តុំភូមិអូបែកក្អម។ ទី៣ឈ្មោះ ម៉ៅ ឡេង ភេទស្រី អាយុ២៥ឆ្នាំ មុខរបរ និងស្នាក់នៅមិនពិតប្រាកដ។ ទី៤ ឆន ស្រីណៃ ភេទស្រី អាយុ២៦ឆ្នាំ មុខរបរ និងស្នាក់នៅមិនពិតប្រាកដ។ ទី៥ ឈ្មោះ ស៊ុំ សុវណ្ណដេត ភេទប្រុស អាយុ៣៤ឆ្នាំ មុខរបរធ្វើសំណង់ ស្នាក់នៅក្នុងការដ្ឋានសំណង់ម្តុំស្ពានដែក ខណ្ឌដង្កោ និងទី៦ ឈ្មោះ លី សា ភេទប្រុស អាយុ៣៤ឆ្នាំ មុខរបរធ្វើសំណង់ ស្នាក់នៅម្តុំស្ពានដែកខណ្ឌដង្កោ ។

ប្រភពបន្តថា សមត្ថកិច្ចបានស្រាវជ្រាវរហូតឈានដល់ការឃាត់ខ្លួនជនសង្ស័យ និងដកហូតវត្ថុតាងនូវឧប្បកណ៍សំរាប់ប្រើប្រាស់មួយចំនួន ហើយបាននាំខ្លួនយកមកធ្វើតេស្តិ៍ទឹកនោម ពួកគេសុទ្ធតែមានសារធាតុញៀនទាំងអស់។

បច្ចុប្បន្នជនសង្ស័យប្រុសស្រីទាំង៦នាក់នេះកំពុងឃាត់ខ្លួនជាបណ្តោះអាសន្ន នៅអធិការដ្ឋានគរបាលខណ្ឌសែនសុខដើម្បីចាត់ការបន្តតាមនីតិវិធី៕ តុង សីហា