សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ខ្សែភាពយន្តរឿង “អាមោក លក់ម៉ាំ” ដែលផលិតកម្មមហាហង្សផលិតទុកចោលអស់រយៈពេលជាយូមកហើយនោះនឹងត្រូវដាក់បញ្ចាំងជាផ្លូវការក្នុងពេលឆាប់ៗនេះហើយ។ ការផ្អាកចាក់បញ្ចាំង គឺស្របពេលដែលកន្លងមកចាងហ្វាង ផលិតកម្មខាងលើគឺលោក អ៊ិន សុភិន មានបញ្ហាខ្លាំងជាមួយលោក ប៉ែន ចំរ៉ុង កាលពីជាងមួយឆ្នាំមុន។
ភាពយន្តដែលសម្ដែងដោយ ប៉ែន ចំរុ៉ង គឺរឿង “អាមោកលក់ម៉ាំ” នឹងចាក់បញ្ចាំង បន្ទាប់ពីរឿងអាស្រូវរបស់ ប៉ែន ចំរុ៉ង ជា មួយអ្នកនាងភិន សុលីស បានស្ងប់ស្ងាត់ និងលែងលះគ្នារួចរាល់។ លោកអុីន សុភិន ចាងហ្វាងផលិតកម្ម មហាហង្ស និយាយថា ការសម្រេចដាក់បញ្ចាំងរឿងនេះគឺគ្មានអ្វីពាក់ព័ន្ធជាមួយលោក ប៉ែន ចំរុ៉ង ដែលជាអតីតស្វាមីកូនស្រីរបស់លោកទេ គឺផលិតកម្ម សម្រេចចាក់បញ្ចាំងព្រោះរឿងនេះផលិតចប់យូរណាស់មកហើយ។លោកបានបញ្ជាក់ថា “ខ្ញុំគិតថា វាជារឿងផ្សេងគ្នាភាពយឺតយាវក្នុងការចាក់បញ្ចាំងរឿងនេះ ព្រោះតែមានភាពរអាក់រអួល ខ្លះៗរបស់ផលិតកម្ម និងគ្មានពេលគ្រប់គ្រាន់។ ម្យ៉ាងណាយើងរវល់តែផ្ដោតលើរឿងភាគ ហើយរោងកុនគ្មានម៉ោងឱ្យយើង ទើបយើងពន្យារដល់ពេលនេះ”។
បើទោះជាលោក ប៉ែន ចំរុ៉ង លែងលះជាមួយកូនស្រីរបស់ខ្លួនក្ដី លោក អុីន សុភិន នៅតែអះអាងថា ខ្សែភាពយន្ត នេះនឹងមិនប៉ះពាល់ដល់ទីផ្សារអ្នកទស្សនានោះទេ ហើយលោកជឿជាក់ថា ខ្សែភាពយន្តសម្រិតសម្រាំងនេះនឹងទទួលបានការចាប់អារម្មណ៍ច្រើនពីទស្សនិកជន។ផលិតកររូបនេះមិនទាន់ច្បាស់ក្នុងចិត្តនៅឡើយទេថា តើ លោក ប៉ែន ចំរុ៉ង ដែលជាតួឯកក្នុងរឿង “អាមោកលក់ម៉ាំ” នឹងចូលរួមសម្ពោធភាពយន្តនេះនៅក្រោយពិធីចូលឆ្នាំប្រពៃណី រួចនៅឡើយទេ ដោយរង់ចាំមើលពេលវេលាសិន។
ខ្សែភាពយន្តរឿង “អាមោកលក់ម៉ាំ” ជាស្នាដៃថ្មីមួយទៀតរបស់ផលិតកម្ម មហាហង្ស ដែលសម្ដែងដោយលោក ប៉ែន ចំរុ៉ង និងកញ្ញា ជីជី។ យ៉ាងណាខ្សែភាពយន្តនេះបានផ្អឹបទុកមួយរយៈបន្ទាប់ពី ប៉ែន ចំរុ៉ង និង ភិន សុដាលីស ដាក់ពាក្យលែងលះគ្នា ហើយទើបសម្រេចប្រកាសចាក់បញ្ចាំងនាពេលនេះ ក្រោយបញ្ហានេះបានស្ងប់ស្ងាត់មួយរយៈធំ៕ វឌ្ឍនា
