សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ត្រូវបានសមត្ថកិច្ចល្បាតឃាត់ខ្លួន បន្ទាប់ពីឆែកឆេររកឃើញថ្នាំញៀន១២កញ្ចប់តូច លាក់ទុកនៅលើខ្លួន ។ ហេតុការណ៍នេះ បានកើតឡើងកាលពីវេលាម៉ោង៦និង៣០នាទីយប់ ថ្ងៃទី០៩ ខែឧសភា ឆ្នាំ២០១៧ ត្រង់ចំណុចផ្លូវលំ ក្បែរទីលាន់ចាក់សំរាមចាស់ ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ។
ជនសង្ស័យខាងលើនោះមានឈ្មោះ អ៊ុំ បូផា ហៅហ្គិច ភេទប្រុស អាយុ១៥ឆ្នាំ មុមស្នាកនៅក្រុមទី៦ ភូមិដំណាក់ធំ សង្កាត់ស្ទឹងមានជ័យ មានស្រុកកំណើរស្រុកទ្រាំង ខេត្តតាកែវ ។
តាមប្រភពពីលោក ឯម ភារីនាយប៉ុស្តិ៍ស្តីទី ប៉ុស្តិ៍នគរបាលរដ្ឋបាលស្ទឹងមានជ័យបានរៀបរាប់ឲ្យដឹងថា នៅមុនពេលកើតហេតុ គាត់បានដឹកនាំកំលាំងជិះល្បាតដើម្បីកាត់បន្ថយបទល្មើសក្នុងមូលដ្ឋានដោយប្រការណាមួយ លុះពេលជិះល្បាតមកដល់ចំណុចកើតហេតុ ក៏ប្រទះឃើញជនសង្ស័យខាងលើកំពុងឈរក្នុងលក្ខណៈសង្ស័យ រួចក៏បានឃាត់ខ្លួនដើម្បីឆែកឆេរ ពេលដែលកំពុងតែឆែកឆេរ ក៏រកឃើញថ្នាំញៀនប្រភេទក្រាមសថ្លាចំនួន១២កញ្ចប់តូច កាន់លាក់ទុកក្នុងហោប៉ៅខោ ហើយក៏បាននាំខ្លួនជនសង្ស័យខាងលើយកទៅសាកសួរនាំនៅប៉ុស្តិ៍នគរបាលរដ្ឋបាលស្ទឹងមានជ័យ។
បច្ចុប្បន្នជនសង្ស័យខាងលើព្រមទាំងវត្ថុតាងកំពុងកសាងសំណុំរឿងបញ្ជូនទៅអធិការដ្ឋានខណ្ឌមានជ័យរង់ចាំការចាត់ការតាមនីតិវិធី ៕ ភារ៉ា ដង្កោ
