សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ បុរសម្នាក់ខណៈកំពុងបើករថយន្តមួយគ្រឿងម៉ាកហ្វត រវល់ក្រឡេកមើលទូរស័ព្ទ បានរេចង្កូតផ្ទះប្រជាពលរដ្ឋ បណ្ដាលឲ្យរថយន្ត និងផ្ទះរងការខូចខាតកាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី២៤ ខែឧសភា ឆ្នាំ២០១៧ នៅតាមបណ្តោយផ្លូបេតុងបុរីពិភពថ្មី សាលាមុំ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ។
អ្នកបើកបររថយន្តបង្ករឈ្មោះ រស់ សុខឈីម អាយុ ៣២ឆ្នាំ មុខរបរជាងដែក ស្នាក់នៅផ្ទះលេខ៧៤ ផ្លូ A ក្នុងបុរីពីភពថ្មី ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
សាក្សីឃើញហេតុការន៍នេះបានឲ្យដឹងថា មុនពេលកើតហេតុ បុរសខាងលើបានបើករថយន្តម៉ាក FORD ២បាំង ពណ៌ស ពាក់ស្លាកលេខភ្នំពេញ 2AI-1674 តាមបណ្តោយផ្លូវបេតុងបុរីពិភពថ្មីក្នុងទិសដៅពីលិចទៅកើត។ លុះពេលមកដល់ចំណុចកើតហេតុមិនដឹងរឿងអីស្រាប់តែរថយន្តនេះបានរេចង្កូតទៅបុកផ្ទះប្រជាពលរដ្ឋទាំងកំរោលនិងធ្វើឲ្យរថយន្តខូចមួយចំហៀងមុខខាងស្តាំតែម្តង។
ចំណែកបុរសអ្នកបើកបររថយន្តបង្កវិញបាននិយាយថាមុនពេលកើតហេតុគាត់បើករថយន្តពីចោមចៅទៅផ្ទះ ហើយពេលធ្វើដំណើរដល់កន្លែងកើតហេតមានមិត្តភក្តិម្នាក់បានទូរស័ព្ទមកនិយាយជាមួយ រួចគាត់បានលើកទូរស័ព្ទយកមកកាន់និយាយនិង មិនបានមើលផ្លូវ ស្រាប់តែងាកមកវិញ រថយន្តបានរេចង្កូតបុកបង្គោលយ៉ាបផ្ទះគេតែម្តង។
ក្រោយកើតហេតុ សមត្ថកិច្ចនគរបាលចរាចរខណ្ឌសែនសុខបានចុះទៅដល់ តែម្ចាស់ផ្ទះ និងម្ចាស់រថយន្តបង្កបានឲ្យសមត្ថកិច្ចធ្វើកំណត់ហេតុ ធ្វើកិច្ចសន្យាចេញថ្លៃជួសជុលខូចខាត ដើម្បីបញ្ចប់រឿងនៅកន្លែងកើតហេតុដោយមិនរំខានសមត្ថកិច្ចមូលដ្ឋានឡើយ ៕ ប្រាថ្នា
