សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ កាលពីវេលាម៉ោង២និង៤០នាទីរំលងអធ្រាត្រ ឈានចូលថ្ងៃទី៧ ខែមិថុនា ឆ្នាំ២០១៧ នៅលើផ្លូវជាតិលេខ៥៧Aត្រង់ចំណុចក្រុមទី៣ ភូមិកំប៉ូវ ឃុំភ្នំសំពៅ ស្រុកបាណន់ ខេត្តបាត់ដំបង មានករណីគ្រោះថ្នាក់ចរាចរណ៍បណ្តាលឲ្យស្លាប់ម្នាក់ និងម្នាក់ទៀតរបួសធ្ងន់ ។
ប្រភពព័ត៌មានរាយការណ៍ថា គ្រោះថ្នាក់ចរាចរណ៍នេះកើតឡើងរវាងរថយន្កូរ៉េចំណុះ៥តោន និងម៉ូតសណ្តោងរ៉ឺម៉កក្នុងទិសដៅបញ្ច្រាសគ្នា ពីកើតទៅលិច ដោយរថយន្តម៉ាក hyundai ពណ៌ស5តោន ពាក់ស្លាកលេខ ភ្នំពេញ 3A1495 បានបុកហើយក្រឡាប់នៅកន្លែងកើតហេតុ ។ អ្នកបើករថយន្តបង្កបានរត់គេចខ្លួនបាត់ស្រមោល ។
រថយន្តបង្កបើកបរល្បឿនលឿនរេចង្កូតបុកម៉ូតូសណ្តោងរ៉ឺម៉ក ១គ្រឿងម៉ាកhonda Dream C125ពណ៌ខ្មៅពាក់ស្លាកលេខ បាត់ដំបង1G 8503 បើកបរដោយឈ្មោះ មិត្ត សាមឿន ភេទប្រុស អាយ២៧ឆ្នាំ រស់នៅភូមិក្រពើកើត ឃុំភ្នំសំពៅ ស្រុកបាណន់ ខេត្តបាត់ដំបង មានពាក់មួកសុវត្ថិភាព បានស្លាប់នៅកន្លែងកើតហេតុ រីឯអ្នក រួមដំណើរ ម្នាក់ទៀត ត្រូវជាប្រពន្ធ ឈ្មោះ ហេង នាង ភេទស្រី អាយុ២៥ឆ្នាំ ពាក់មួកសុវត្ថិភាព រងរបួសធ្ងន់ ត្រូវកម្លាំងសមត្ថកិច្ចបញ្ចូនទៅសង្គ្រោះនៅមន្ទីរពេទ្យបង្អែកខេត្តបាត់ដំបងដោយរថយន្តសង្គ្រោះឃុំភ្នំសំពៅ ។
ចំណែករថយន្ត និងម៉ូតូខូចខាតធ្ងន់ត្រូវបានកម្លាំងជំនាញចរាចរណ៍ផ្លូវគោកនគរបាលខេត្តនាំយកទៅរក្សាទុកនៅការិយាល័យចរាចរណ៍ផ្លូវគោកខេត្តដើម្បីរង់ចាំដោះស្រាយជាបន្តនៅពេលក្រោយ។ ចំណែកសាកសពត្រូវសាច់ញាតិទទួលយកទៅធ្វើបុណ្យតាមប្រពៃណី ៕
