បើកបរល្បឿនលឿនខ្វះការប្រុងប្រយ័ត្នធ្លាក់ជង្ហុកដួលរងរបួសខ្លួនឯង

ខេត្តកណ្តាល៖ នារីវ័យ១៨ឆ្នាំម្នាក់ បើកបរម៉ូតូល្បឿនលឿន ខ្វះការប្រុងប្រយ័ត្នធ្លាក់ជង្ហុកបណ្តាលឲ្យដួលម៉ូតូរងរបួសធ្ងន់ខ្លួនឯង ។

ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង៧និង២០នាទីព្រឹក ថ្ងៃទី៩ ខែមិថុនា ឆ្នាំ២០១៧ ស្ថិតនៅចំណុចផ្លូវលេខ១១០ ភូមិឫស្សីស្រុក ឃុំឈើទាល ស្រុកកៀនស្វាយ ខេត្តកណ្តាល ។

សមត្ថកិច្ចឲ្យដឹងថា ជនរងគ្រោះឈ្មោះ សុខ ដាវីន ភេទស្រី អាយុ ១៨ ឆ្នាំ ជនជាតិខ្មែរ​ មុខរបរ កសិករ នៅភូមិឈើទាល ឃុំឈើទាល ស្រុកកៀនស្វាយ ខេត្តកណ្ដាល បើកម៉ូតូម៉ាក C125 ពណ៌ខ្មៅ ផលិតឆ្នាំ ២០១០ ពាក់ស្លាកលេខ កណ្ដាល 1L.0697បើកមានទិសដៅពីច្បារអំពៅទៅឃុំកំពង់ស្វាយ ក្នុងល្បឿនលឿន ពេលមកដល់ ចំណុចកើតហេតុមិនបានមើលផ្លូវមានជង្ហុកខាងមុខ ក៏ជិះម៉ូតូធ្លាក់ជង្ហុកផ្លូវបណ្ដាលឲ្យម៉ូតូ និងជនរងគ្រោះហោះ និងដួលបោកក្បាលលើផ្លូវចម្ងាយ១០ម៉ែត្រ រងរបួសធ្ងន់បែកក្បាល ដោយសារជនរងគ្រោះមិនបានពាក់មួកសុវត្ថិភាព ។

ករណីខាងលើនេះ ជនរងគ្រោះត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យរុស្សី ក្រុងភ្នំពេញ ចំណែកម៉ូតូត្រូវបានក្រុមគ្រួសាយកទៅទុកផ្ទះដែរ ៕