សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ ករណីហិង្សាមួយបានកើតឡើង បណ្តាលឲ្យនារីវ័យក្មេងម្នាក់រងរបួសធ្ងន់ ត្រូវសាច់ញាតិបញ្ជូនទៅកាន់មន្ទីរពេទ្យ ក្រោយនារីតែងខ្លួនជាបុរសម្នាក់ដែលត្រូវគេអះអាងថា បានស្រឡាញ់ និងរួមរស់ជាមួយនារីរងគ្រោះបាន៦ខែរួចហើយ លុះចុងក្រោយនេះ នារីរងគ្រោះចង់ទៅរៀបការប្តីថ្មីតាមឪពុកម្តាយ ធ្វើឲ្យរូបគេទប់កំហឹងមិនបាន កើតរោគប្រចណ្ឌ ក៏ទាញ់កាំបិតចាក់ឆុចៗតែម្តង ។ បន្ទាប់មក ជនសង្ស័យបានលេបថ្នាំកណ្តុរបំណងបញ្ចប់ជីវិតដែរ ប៉ុន្តែត្រូវសមត្ថកិច្ចទៅទាន់បញ្ជូនទៅពេទ្យសង្គ្រោះទាន់ពេល រួចផុតពីរណ្តៅមរណៈ ។
ហេតុការណ៍នេះបានភ្ញាក់ផ្អើលឡើងកាលពីវេលាម៉ោង១៩ ថ្ងៃទី៨ ខែមិថុនា ឆ្នាំ២០១៧ ស្ថិតនៅនៅចំណុចក្នុងបន្ទប់ផ្ទះជួលលេខ១៣ ជាន់ទី១ ភូមិត្រពាំងជួន ឃុំឆក់ឈើនាង ស្រុកអង្គស្នួ ខេត្តកណ្តាល។
ប្រភពព័ត៌មានពីសមត្ថកិច្ចបានបញ្ជាក់ថា ជនរងគ្រោះ ឈ្មោះ ហ៊ុន ស្រីពៅ ភេទស្រី អាយុ១៩ឆ្នាំ ជនជាតិខ្មែរ មុខរបរកម្មការិនីរោងចក្រ មានស្រុកកំណើតនៅភូមិថ្មដា ឃុំបឹងណាយ ស្រុក ព្រៃឈរ ខេត្តកំពង់ចាម បច្ចុប្បន្ននៅផ្ទះជួលភូមិ ឃុំកើតហេតុ ។ រីឯជនសង្ស័យដែលត្រូវឃាត់ខ្លួន ឈ្មោះ ហង់ ធា ហៅឆៃ ភេទស្រី(ធ្វើប្រុស)អាយុ២៥ឆ្នាំ ជនជាតិខ្មែរ មានស្រុកកំណើតនៅភូមិតាំងគម្ពី ឃុតាំងក្រូច ស្រុកសំរោងទង ខេត្តកំពង់ស្ពឺ បច្ចុប្បន្នស្នាក់នៅកន្លែងកើតហេតុ មុខរបរកម្មការិនីរោងចក្រ ។
សមត្ថកិច្ចបញ្ជាក់ទៀតថា ករណីហិង្សានេះបណ្តាលឲ្យជនរងគ្រោះ រងរបួស ក្រោមគុម្ពដោះខាងឆ្វេង១កាំបិត ឆ្អឹងខ្នង១កាំបិត និងរបួសក្បាល ហើយជាក់ស្តែងសមត្ថកិច្ចដកហូតវត្ថុតាង កាំបិតចិតបន្លែ ដងពណ៌លឿង១ដើមផងដែរ ។
សេចក្តីរាយការណ៍បន្តទៀតថា នៅមុនហិង្សាកើតឡើង ជនសង្សយ័និងជនរងគ្រោះបានចេញពីធ្វើការរោងចក្រនាំគ្នាមកផ្ទះជួល ហើយបានចាក់សោបន្ទប់ខាងក្នុង ជជែកទាក់ពាក្យសម្តីគ្នារហូតឈានដល់ជនសង្ស័យយកកូនកាំបិតចាក់ជនរងគ្រោះ ទើបមានការស្រែកពីជនរងគ្រោះឲ្យគេជួយ ។ ពេលនោះមានអ្នកនៅជិតខាង និងម្ចាស់ផ្ទះមកជួយវាយបំបែកទ្វារកញ្ចក់ ដើម្បីជួយជនរងគ្រោះ និងបានបញ្ជូនទៅមន្ទីរពេទ្យលោកសង្ឃក្រុងភ្នំពេញភ្លាមៗ ។ ចំណែកជនសង្សយ័បានយកថ្នាំកណ្តុរចាក់អកចូលមាត់លេបអស់មួយកញ្ចប់តូចបំណងសម្លាប់ខ្លួនដែរ តែត្រូវបានកម្លាំងសមត្ថកិច្ចទៅដល់បញ្ជូនទៅមន្ទីរពេទ្យឯកជនបែកចានសង្គ្រោះទាន់ពេលវេលា ។
សមត្ថកិច្ចអះអាងថា ករណីខាងលើនេះ កើតឡើងដោយមូលហេតុ ជនសង្ស័យនិងជនរងគ្រោះស្រឡាញ់រួមរស់ជាមួយគ្នារយះពេល៣ឆ្នាំ៦ខែមកហើយ និងប្រចណ្ឌជនរងគ្រោះដែលចង់រៀបការប្តីថ្មីតាមឪពុកម្តាយ ។
ចំពោះជនសង្ស័យត្រូវបានឃាត់ខ្លួនមកកាន់អធិការដ្ឋាននគរបាលស្រុកអង្គស្នួល ដើម្បីសាកសួរបន្តតាមនីតិវិធី៕ ថាច់ យ៉ាត
