សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ រថយន្តធុនធំប្រភេទបែនដឹកដីបើកបោះពួយបុកម៉ូតូ និងកិនពីលើជនរងគ្រោះបន្ថែម បណ្តាលឲ្យបុរសស្ត្រី២នាក់ប្តីប្រពន្ធស្លាប់យ៉ាងអាណោចអាធ័ម រីឯចៅប្រុសរងរបួសយ៉ាងធ្ងន់ធ្ងន់ កាលពីវេលាម៉ោង៨ និង១០នាទីព្រឹក ថ្ងៃទី១៤ ខែមិថុនា ឆ្នាំ២០១៧ នៅលើកំណាត់ផ្លូវលំ ស្ថិតក្នុងភូមិភូមិក្រោលគោ ឃុំសំបួមាស ស្រុកមុខកំពូល ខេត្តកណ្តាល ។
ក្រោយពីមានហេតុការណ៍កើតឡើង រថយន្តបែនដឹកដីបានបើកគេចចេញពីកន្លែងកើតហេតុ តែត្រូវបានសមត្ថកិច្ចនគរបាលមុខកំពូលស្រាវជ្រាវចាប់បានមកវិញ ខណៈដែលតែកុងរត់គេចខ្លួនបាត់ ។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា រថយន្តបង្កម៉ាកហ៊ីណូ ពណ៌ទឹកប៊ិច ពាក់ស្លាកលេខភ្នំពេញ3A-5307 ជាប្រភេទរថយន្តបែនដឹកដី មានបិទឡីហ្គោ “KN41” បើកបរដោយជនមិនស្គាល់អត្តសញ្ញាណ ។ ជនរងគ្រោះ២នាក់ប្តីប្រពន្ធស្លាប់បាត់បង់ជីវិតនោះឈ្មោះ ស៊ិន អុន ភេទប្រុស អាយុ៥២ឆ្នាំ (ជាអ្នកបើកបរម៉ូតូ) ប្រពន្ធឈ្មោះ ហម ធឿន ភេទស្រី អាយុ៤៨ឆ្នាំ រីឯចៅប្រុសឈ្មោះ រុំ ជីមិញ អាយុ៦ឆ្នាំ (រងរបួសធ្ងន់) ។ ជនរងគ្រោះទាំង៣នាក់មានទីលំនៅភូមិអំពិលទឹក ឃុំសំបួរមាស ស្រុកមុខកំពូល ជិះម៉ូតូធុនសេ១០០កូរ៉េ ពណ៌ក្រហម ពាក់ស្លាកលេខកណ្ដាល1O-0614 ។
ប្រភពដដែលបានបន្តថា នៅមុនពេលកើតហេតុសាក្សីបានឃើញរថយន្តបង្កបើកបរតាមបណ្តោយផ្លូវលំក្នុងទិសដៅពីជើងទៅត្បូង ដោយល្បឿនលឿន ខណៈបើកដល់ចំណុចកើតហេតុបានរេចង្កូតបុកនិងកិនពីលើជនរងគ្រោះ២នាក់ប្តីប្រពន្ធ បណ្តាលឲ្យបែកក្បាលស្លាប់ភ្លាមៗនៅកន្លែងកើតហេតុ រីឯចៅប្រុសរងរបួសធ្ងន់ ។
ក្រោយពីមានហេតុការណ៍កើតឡើង រថយន្តបែនដឹកដីបានបើកគេចចេញពីកន្លែងកើតហេតុ តែត្រូវបានសមត្ថកិច្ចនគរបាលមុខកំពូលស្រាវជ្រាវចាប់បានមកវិញ ខណៈដែលតែកុងរត់គេចខ្លួនបាត់ ។ បច្ចុប្បន្នជនរងគ្រោះរងរបួសធ្ងន់ត្រូវបានបញ្ជូនទៅសង្រ្គោះនៅមន្ទីរពេទ្យក្នុងរាជធានីភ្នំពេញ ។ ចំណែកឯសាកសពជនរងគ្រោះត្រូវបានប្រគល់ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី ។ ដោយឡែកមធ្យោបាយពាក់ព័ន្ធទាំង២គ្រឿងត្រូវបានបញ្ជូនទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ៕ ស្អាងជ័យ
