ឡានពីរគ្រឿងបុកគ្នារងការខូចខាតយ៉ាងដំណំនៅចំណុចផ្លូវបំបែកជាបួន ក្នុងខណ្ឌចំការមន

ភ្នំពេញ៖ គ្រោះថ្នាក់ចរាចរណ៍ ដែលបណ្ដាលមកពីរថយន្ដម៉ាកហាយឡែនឌ័រមួយគ្រឿង បានបើកបរយ៉ាងលឿន ហើយជ្រុលទៅបុកជាមួយរថយន្ដឡិចសុីសLX ៤៧០ បណ្ដាលអោយរថយន្ដទាំងពីរគ្រឿង រងការខូចខាតទាំងសងខាងយ៉ាងដំណំ បង្កឲ្យមានការភ្ញាក់ផ្អើលនៅវេលាម៉ោង២២និង៤០នាទី ថ្ងៃទី១៤ ខែមិថុនា ឆ្នាំ២០១៧ នៅចំណុចផ្លូវលេខ១០៥ កែងនឹងមហាវិថីម៉ៅសេទុង ក្នុងសង្កាត់បឹងកេងកងទី៣ ខណ្ឌចំកាមន រាជធានីភ្នំពេញ។

រថយន្ដបង្កម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ2Z-7306 បើកបរដោយបុរសម្នាក់ទំនងជាស្រវឹងស្រា រួមដំណើរដោយបុរសម្នាក់ទៀតជាមួយគ្នា។ ចំណែករថយន្ដរងគ្រោះម៉ាក ឡិចសុីស៤៧០ ពណ៍ស ពាក់ស្លាកលេខ ភ្នំពេញ2V-6376 បើកបរដោយបុរសម្នាក់។

បើតាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្ដឡិចសុីស៤៧០ធ្វើដំណើរតាមបណ្ដោយផ្លូវលេខ១០៥ទិសដៅពីត្បូងទៅជើងហើយបានឆ្លងកាត់មហាវិថីម៉ៅសេទុងពេលឆ្លងបានពាក់កណ្ដាលផ្លូវក៏ត្រូវរថយន្ដហាយឡែនឌ័រដែលធ្វើដំណើរតាមបណ្ដោយម៉ៅសេទុងទិសដៅពីលិចទៅកើតបុកចំពីចំហៀងរថយន្ដពេញទំហឹងបណ្ដាលអោយរថយន្ដខូចខាតទាំងសងខាង។

ក្រោយកើតហេតុភាគីទាំងសងខាងបាន និយាយយកត្រូវរៀងៗខ្លួន ដោយនិយាយមិនត្រូវគ្នា ទើបសមត្ថកិច្ចទំនាក់ទំនងទៅកំលាំងជំនាញចុះធ្វើការវាស់វែងយករថយន្ដទាំងពីរគ្រឿងទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញដើម្បីរង់ចាំដោះស្រាយតាមផ្លូវច្បាប់៕ ភារ៉ា ដង្កោ