សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តុលាការកំពូល នៅព្រឹកថ្ងៃទី១៦ ខែមិថុនា ឆ្នាំ២០១៧ នឹងបើកសវនាការរឿងក្ដីលោក អ៊ុំ សំអាន តំណាងរាស្ត្រគណបក្សសង្គ្រោះជាតិ ប្តឹងប្រឆាំងនឹងការសម្រេចរបស់សាលាឧទ្ធរណ៍ ដែលផ្តន្ទាទោសដាក់ពន្ធនាគាររយៈពេល២ឆ្នាំ៦ខែ ពាក់ព័ន្ធរឿងផែនទីសន្ធិសញ្ញាកម្ពុជាវៀតណាម ។នេះបើតាមការបញ្ជាក់របស់មន្ត្រីតុលាការកំពូល ។
ទោះបីយ៉ាងណា នៅល្ងាចថ្ងៃទី១៥ ខែមិថុនា ឆ្នាំ២0១៧ ពុំទាន់អាចទាក់ទងសុំការបញ្ជាក់បន្ថែមពីលោក សំ សុគង់ មេធាវីការពារក្ដីលោក អ៊ុំ សំអាន បាននៅឡើយទេ ព្រោះទូរស័ព្ទទាំងពីរប្រព័ន្ធពុំអាចទទួលការហៅចូលបាន ។
គួរបញ្ជាក់ថា ក្រោយបើកសវនាការពេញមួយព្រឹកថ្ងៃទី២៣ ខែធ្នូ ឆ្នាំ២០១៦ កន្លងទៅ សាលាឧទ្ធរណ៍សម្រេចតម្កល់សាលក្រមសាលាដំបូងរាជធានីភ្នំពេញ ទុកជាបានការដដែល ពោលគឺ ផ្តន្ទាទោសលោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដាក់ពន្ធនាគាររយៈពេល២ឆ្នាំ៦ខែនិងពិន័យ៤លានរៀល ។
លោក អ៊ុំ សំអាន ជាប់ចោទចំនួនពីរបទល្មើស គឺ បទញុះញង់ឲ្យប្រព្រឹត្តបទឧក្រិដ្ឋជាអាទិ៍ បង្កភាពវឹកវរធ្ងន់ធ្ងរដល់សន្តិសុខសង្គម និង បទញុះញង់ឲ្យមានការរើសអើង តាមមាត្រា៤៩៥ និង ៤៩៦ នៃក្រមព្រហ្មទណ្ឌ ដែលប្រព្រឹត្តនៅចំណុចរាជធានីភ្នំពេញ និង ព្រះរាជាណាចក្រកម្ពុជា កាលពីអំឡុងឆ្នាំ២០១៥ រហូតដល់ថ្ងៃទី១០ ខែមេសា ឆ្នាំ២០១៦ ។
ក្នុងការសម្រេចនេះ គឺ តុលាការបានអានសំអាងហេតុចំនួន១៥ចំណុច ។ ចំណុចសំខាន់ៗមានដូចជា លោក អ៊ុំ សំអាន ពិតជាមានចេតនាប្រព្រឹត្តបទល្មើស ។ លោក អ៊ុំ សំអាន នៅតែមានអភ័យឯកសិទ្ធិសភា ដដែល តែដោយសារនេះជាបទល្មើសព្រហ្មទណ្ឌជាក់ស្តែង មានចែងតាមមាត្រា៨៦នៃក្រមនីតិវិធី ព្រហ្មទណ្ឌ គឺតុលាការអាចដំណើរការក្តីបានជាធម្មតា ៕ ចេស្តា
