ករណីរំលោភលើទំនុកចិត្តទឹកប្រាក់ជាង២៦ម៉ឺនដុល្លារអាមេរិក ៖ តុលាការនឹងចេញដីការក្សាការពារទ្រព្យសម្បត្តិចុងបណ្តឹង

ចែករំលែក៖

ភ្នំពេញ៖ក្រោយមនុស្សប្រហែលជិត១០០នាក់ កាលពីរសៀលថ្ងៃទី២២ ខែមិថុនា ឆ្នាំ២០១៧ ប្រមូលផ្ដុំគ្នាមុខសាលាដំបូងរាជធានីភ្នំពេញ កើតទុក្ខមិនសុខចិត្ត ដែលលោក សាន សុផាត ចៅក្រមស៊ើបសួរ មិនឃុំខ្លួនស្ត្រីម្នាក់ដែលក្រុមអ្នកតវ៉ាអះអាងថា បានរំលោភលើទំនុកចិត្តទឹកប្រាក់ជាង២៦ម៉ឺនដុល្លារអាមេរិក នោះ នៅសប្តាហ៍ក្រោយនេះ តុលាការនឹងចេញដីការក្សាការពារទ្រព្យសម្បត្តិចុងបណ្ដឹង ដើម្បីធានាបំណុលជូនជនរងគ្រោះ ។ នេះបើតាមបញ្ជាក់របស់ក្រុមជនរងគ្រោះ ។

ស្ត្រីរូបនេះ បានត្រូវលោក សាន សុផាត ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីថ្ងៃទី២១ ខែមិថុនា ឆ្នាំ២០១៧ដោះលែងឲ្យមានសេរីភាពវិញ ។ ប៉ុន្តែ ដាក់ឲ្យស្ថិតក្រោមការត្រួតពិនិត្យតាមផ្លូវតុលាការ ដោយភ្ជាប់នូវប្រាក់តម្កល់ធានាខ្លួនមួយចំនួន ។

ស្ត្រីរូបនេះឈ្មោះ ឆាយ គឹមហួយ អាយុ៤៧ឆ្នាំ មានទីលំនៅផ្ទះ៥១ហ្សេ ភូមិកៀនឃ្លាំង សង្កាត់ព្រែកលៀប ខណ្ឌជ្រោយចង្វា បានត្រូវសមត្ថកិច្ចនគរបាលព្រហ្មទណ្ឌក្រសួងមហាផ្ទៃឃាត់ខ្លួន កាលពីថ្ងៃទី១៦ ខែមិថុនា ឆ្នាំ២០១៧ យោងតាមពាក្យបណ្តឹងរបស់ឈ្មោះ ម៉េង សុខហៀង រួចកសាងសំណុំរឿងបញ្ជូនមកតុលាការ ដើម្បីចាត់ការតាមច្បាប់ ។ បន្ទាប់មក លោក លី សុផាណា ព្រះរាជអាជ្ញារងអមសាលាដំបូងរាជធានីភ្នំពេញ ធ្វើការសាកសួរ រហូតឈានដល់ការចោទប្រកាន់ស្ត្រីរូបនេះពីបទ រំលោភលើទំនុកចិត្ត រួចបញ្ជូនសំណុំរឿងនេះទៅចៅក្រមស៊ើបសួរ ចាត់ការតាមនីតិវិធី ។

ប្រភពព័ត៌មានពីសមត្ថកិច្ច បានបញ្ជាក់ថា កាលពីអំឡុងខែកក្កដា ឆ្នាំ២០១៦ នៅផ្សារព្រែកលៀប ឈ្មោះ ម៉េង សុខហៀង បានបង្កើតជាសមាគមតុងទីនមួយ ហើយឈ្មោះ ឆាយ គឹមហួយ បានមកលួងលោមសុំចូលរួមលេងតុងទីនចំនួន៦ខ្សែ និង ប្រើល្បិចកលទុច្ចរិត ដោយដាក់បន្លំឈ្មោះខ្មោច ជាកូនតុងទីនជាច្រើននាក់ ។ ក្នុងការលេងនេះ មានខ្សែទី១ តម្លៃ៣០០ដុល្លារ លេងចំនួន៥ក្បាល ស្មើនឹងទឹកប្រាក់ចំនួន៤០៥០០ដុល្លារ ។ ខ្សែទី២ តម្លៃ២០០ដុល្លារ លេងចំនួន៥ក្បាល ស្មើនឹងទឹកប្រាក់ចំនួន៦២០០០ដុល្លារ ។ ខ្សែទី៣ តម្លៃ៥០ដុល្លារ លេងចំនួន៥ក្បាល ស្មើនឹងប្រាក់ចំនួន៧៥០ដុល្លារ ។ ខ្សែទី៤ តម្លៃ១០ដុល្លារលេងចំនួន២០ក្បាល ស្មើនឹងទឹកប្រាក់ចំនួន៤៨៨០០ដុល្លារ ។ ខ្សែទី៥ តម្លៃ១០ដុល្លារ លេងចំនួន១៥ក្បាល ស្មើនឹងទឹកប្រាក់ចំនួន ៧០៣០០ដុល្លារ និង ខ្សែទី៦ តម្លៃ៥ម៉ឺនរៀល លេងចំនួន១០ក្បាល ស្មើនឹងទឹកប្រាក់៤៣២៥០ដុល្លារ ។

ប្រភពដដែលបានអះអាងថា ឈ្មោះ ឆាយ គឹមហួយ បានដេញយកតុងទីននេះទាំងអស់ សរុបចំនួន២៦៥៦០០ដុល្លារ រួចគេចខ្លួនបាត់ ទើបមេតុងទីនឈ្មោះ ម៉េង សុខហៀង បានដាក់ពាក្យបណ្តឹងមកនគរបាល ដើម្បីឲ្យចាត់ការតាមច្បាប់ ៕ ចេស្តា