សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ កម្លាំងនគរបាលខណ្ឌឫស្សីកែវបានឃាត់ខ្លួនជនសង្ស័យដែលជាមុខសញ្ញាចែកចាយគ្រឿងញៀនយ៉ាងសកម្មម្នាក់ នៅក្នុងផ្សារតាប៊ុន កាលពីវេលាម៉ោង៥ល្ងាច ថ្ងៃទី២៧ ខែមិថុនា ឆ្នាំ២០១៧ ស្ថិតនៅចំណុចផ្លូវលំ ក្រុម៤ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ ។
មន្រី្តនគរបាលខណ្ឌឫស្សីកែវបានឲ្យដឹងថា ជនសង្ស័យដែលសមត្ថកិច្ចឃាត់ខ្លួនពាក់ព័ន្ធការជួញដូរថ្នាំញៀននេះ មានឈ្មោះ ណាត ផាយុទ្ធ ភេទប្រុស អាយុ២៧ឆ្នាំ ជនជាតិខ្មែរ មុខរបរមិនពិតប្រាដក ស្នាក់នៅចំណុចផ្លូវលំ ក្រុម១០ ភូមិលូ សង្កាត់ស្វាយប៉ាក ខណ្ឌឫស្សីកែវ។
សមត្ថកិច្ចដដែលបានឲ្យដឹងទៀតថា នៅមុនពេលចុះបង្ក្រាបឈានដល់ឃាត់ខ្លួនជនសង្ស័យខាងលើនេះ គឺកម្លាំងនគរបាលខណ្ឌឫស្សីកែវ សហការជាមួយកម្លាំងនគរបាលប៉ុស្តិ៍ស្វាយប៉ាកបានបានជិះម៉ូតូល្បាតក្នុងមូលដ្ឋានដើម្បីការពារសុវត្ថិភាពជូនប្រជាពលរដ្ឋក្នុងមូលដ្ឋាន។ ខណៈពេលជិះមកដល់ចំណុចផ្លូវលំខាងលើ ក៏បានប្រទះឃើញជនសង្ស័យកំពុងឈររេរាមើលទៅគួរឲ្យសង្ស័យ សមត្ថកិច្ចបានហៅឲ្យឈប់ តែជនសង្ស័យមិនព្រមឈប់ ហើយថែមទាំងរត់គេចទៀត។ដោយឃើញសកម្មភាពបែបនេះទើប កម្លាំងសមត្ថកិច្ច បានដេញតាម ចាប់ជនសង្ស័យខាងលើបាន ព្រមទាំងឆែកឆេររកឃើញម្សៅក្រាមពណ៌សថ្លា ចំនួន២២កញ្ចប់ ដោយក្នុងនោះមានមួយកញ្ចប់ធំ និងកូនកាំបិតតូច១ដើម ហើយសមត្ថកិច្ច បានឃាត់ខ្លួន យកមកសួរនាំនៅប៉ុស្តិ៍នគរបាលរដ្ឋបាលស្វាយប៉ាកតែម្តង។
បច្ចុប្បន្ន ជនសង្ស័យ រួមនឹងវត្ថុតាង ត្រូវបានសមត្ថកិច្ចបញ្ជូនទៅឃុំខ្លួនជាបណ្តោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅសាលាដំបូងរាជធានីចាត់ការតាមនីតិវិធី ៕ ប្រាថ្នា
