សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ សមត្ថកិច្ចនគរបាលស្រុកពញាឮ បង្រ្កាបចាប់ខ្លួនជនសង្ស័យម្នាក់ឆែកឆេរលំនៅឋាន តាមការឯកភាពពីលោកព្រះរាជអាជ្ញា ឈានដល់រឹបអូសថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន០៣កញ្ចប់ កាលពីវេលាម៉ោង២០ និង៣០នាទី ថ្ងៃទី២៨ ខែមិថុនា ឆ្នាំ២០១៧ ស្ថិតក្នុងភូមិម្លូម៉ឺន ឃុំផ្សាដែក ស្រុកពញាឮ ខេត្តកណ្តាល ។
មន្ត្រីនគរបាលស្រុកពញាឮបានឲ្យដឹងថា ជនសង្ស័យឈ្មោះ ឆេង ម៉េងលី ភេទប្រុស២០ឆ្នាំ ជនជាតិខ្មែរ មុខរបរ នៅផ្ទះ មានទីលំនៅភូមិម្លូម៉ឺន ឃុំផ្សាដែក ស្រុកពញាឮ ។ ក្នុងប្រតិប្រត្តិការបង្រ្កាបចាប់ខ្លួនជនសង្ស័យខាងលើនេះ សមត្ថកិច្ចនគរបាលបានធ្វើការដកហូតវត្ថុតាងថ្នាំញៀន០៣កញ្ចប់ ,ទូរស័ព្ទដៃ០១គ្រឿង ,ដាវចំនួន០១ដើម និងឧបករណ៍សម្រាប់សេពគ្រឿងញៀនមួយចំនួន ។
ប្រភពដដែលបានបន្តថា នៅមុនពេលកើតហេតុកម្លាំងជំនាញអធិការដ្ឋាននគរបាលស្រុកពញាឮ បានទទួលព័ត៌មានពីមហាជនល្អថា មានមុខសញ្ញាកំពុងជួញដូរសារធាតុញៀន នៅចំណុចខាងលើនេះ ទើបកំលាំងជំនាញចុះស្រាវជ្រាវធ្វើការបង្រ្កាបរហូតឈានដល់ចាប់ខ្លួនជនសង្ស័យខាងលើនេះ និងសុំការឯកភាពពីលោកព្រះរាជ្ញាអមសាលាដំបូងខេត្ត ធ្វើការឆែកឆេរលំនៅឋានជនសង្ស័យ ដកហូតវត្ថុតាងពាក់ព័ន្ធ ដើម្បីកសាងសំណុំរឿងចាត់ការតាមច្បាប់៕ ស្អាងជ័យ
