សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ចៅហ្វាយក្រុងភ្នំពេញ បានប្ដេជ្ញាចិត្ដថា លោកនិងខិតខំ ធ្វើប្រឡាយ និងលូ បញ្ជៀស ជំនន់ ទឹកភ្លៀង នៅរាជាធានីភ្នំពេញ នារដូវវស្សាឆ្នាំនេះ ឲ្យបានជូនពលរដ្ឋ បន្ទាប់ពីមាន សំណូមពរ និងការរិះគុណ ពីបងប្អូន ប្រជាពលរដ្ឋ ជាច្រើនម៉ឺននាក់ នៅរាជធានី កន្លងមក ។ អភិបាលរាជធានីភ្នំពេញ លោក ឃួង ស្រេង បានប្ដេជ្ញា ចិត្ដបែបនេះ ខណៈ លោកនិងមន្ដ្រីជំនាញ បានចុះ ទៅពិនិត្យ មើលបណ្តាញលូ និងប្រឡាយ នៅក្នុងភូមិសាស្រ្តសង្កាត់ចោមចៅ ខណ្ឌពោធិសែនជ័យ ដើម្បីរំដោះជំនន់ទឹកភ្លៀងនៅរដូវវស្សា ដោយបានធ្វើដំណើរថ្មើរជើងជាច្រើនគីឡូម៉ែត្រ ពិនិត្យពីស្ថានភាពប្រឡាយរំដោះទឹកចេញពី៥ភូមិ នៅក្នុងសង្កាត់ចោមចៅ ខណ្ឌពោធិ៏សែនជ័យ កាលពីព្រឹកថ្ងៃទី ០២ កក្ដដា ឆ្នាំ២០១៧ ។
អមដំណើរអភិបាលរាជធានី លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា៖ ការចូះពិនិត្យមើលបណ្តាញលូ និងប្រឡាយ នៅក្នុងភូមិសាស្រ្តសង្កាត់ចោមចៅ ខណ្ឌពោធិសែនជ័យ របស់លោកអភិបាលរាជធានីភ្នំពេញនេះ ធ្វើឡើងក្រោយពីមានសំណូមពរ ពីប្រជាពលរដ្ឋនៅតំបន់នេះ ដោយកន្លងមក និងនៅពេលខាងមុខនេះ ពេលមានភ្លៀងខ្លាំងម្តងៗ តំបន់នេះទទួលរងការលិចលង់។
លោក មាស ម៉េតភក្តី បានបន្តថា ៖ ដើម្បីដោះស្រាយពីកង្វល់ និងការលំបាករបស់បងប្អូនប្រជាពលរដ្ឋ ទើបលោកអភិបាលរាជធានីភ្នំពេញថ្មី ចុះមកពិនិត្យទីតាំងខាងលើជាក់ស្តែងតែម្តង ដើម្បីពិនិត្យលទ្ធភាពថា តើគួរតែធ្វើយ៉ាងណា ដើម្បីរំដោះទឹកចេញពីតំបន់នេះ ឲ្យបានល្អ និងកាត់បន្ថយឲ្យបានពីការលិចលង់។ លោក ម៉េត មាសភក្តី បានបន្តទៀតថា៖ រដ្ឋបាលរាជធានីភ្នំពេញ ក្រោមការដឹកនាំរបស់លោក ឃួង ស្រេង គឺពិតជាមានសំណើ និងសំណូមពរជាច្រើនពីប្រជាពលរដ្ឋ ដើម្បីឲ្យរដ្ឋបាលរាជធានីភ្នំពេញជួយពួកគាត់។ សម្រាប់រដ្ឋបាលរាជធានីភ្នំពេញ នៅតែដោះស្រាយជូនប្រជាពលរដ្ឋជានិច្ច ដោយលោកបញ្ជាក់ថា រាល់សំណើ និងសំណូមពររបស់បងប្អូនប្រជាពលរដ្ឋ យើងនឹងអនុវត្តការងារជាអាទិភាពពមុនគេចំពោះសំណើ និងសំណូមពរណាដែលមានភាពចាំបាច់ និងប្រឈមខ្លាំង។
មួយចំណែកនៃការចុះពិនិត្យនេះ លោក ឃួង ស្រេង បានពិនិត្យមើលផ្លូវបេតុង និងលូដែលកំពុងបើកការដ្ឋានស្ថាបនា ចាប់ពីផ្លូវសហព័ន្ធរុស្សី ម្តុំដងនង្គ័លដល់វិមានសព ដែលមានទទឹង១២ម៉ែត្រ បណ្តោយ៦៥០ម៉ែត្រ ដាក់លូទំហំមួយម៉ែត្រកន្លះ។ ចំពោះកាដ្ឋាននេះយើងដាក់លូសម្រេចបាន១០០ភាគរយហើយ ស្របជាមួយនឹងកាដ្ឋានធ្វើផ្លូវទើបតែ សម្រេចបាន៥០ភាគរយប៉ុណ្ណោះ ហើយការដ្ឋាននេះគ្រោងនឹងបញ្ចប់ ក្នុងរយៈពេលមួយខែទៀត។ លោក ម៉េត មាសភក្តី បញ្ជាក់ផងដែរថា ការដ្ឋានដាក់លូលើផ្លូវនេះ អាចរំដោះទឹកមួយចំណែកចេញពីតំបន់ព្រលានយន្តហោះភ្នំពេញ និងនៅក្នុងភូមិជុំវិញនេះ។ មន្ត្រីជំនាញនៃមន្ទីរសាធារណការ និងដឹកជញ្ជូន រាជធានីភ្នំពេញ បានឲ្យដឹងថា ជាគម្រោងដែលលោកអភិបាលរាជធានីភ្នំពេញថ្មី ចុះមកពិនិត្យនេះ យើងនឹងដាក់លូអក្សរ U ទំហំ២ម៉ែត្រ៤ជ្រុង ចាប់ពីព្រៃជីសាក់ ទៅប្រឡាយភូមិចំការឱឡឹក បន្តទៅបឹងតាប៉ែន ហូរទំលាក់ទៅប្រឡាយទួលសំពៅ។ បណ្តាញលូដែលត្រូវស្ថាបនាឡើង មានប្រវែង៣គីឡូម៉ែត្រ។ ប្រឡាយលូនេះ ពិតជាមានសារៈសំខាន់ណាស់ក្នុងការរំដោះទឹកចេញពី៥ភូមិ គឺភូមិព្រៃជីសាក់ ភូមិព្រៃទា ភូមិចំការឳឡឹក ភូមិព្រៃព្រីងខាងជើងនិងភូមិព្រៃសិលា៕ សំរិត
