សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ យ៉ាងហោចបុរសម្នាក់បានរងរបួសយ៉ាងធ្ងន់ធ្ងរ និងរងការខូចខាតមធ្យោបាយម៉ូតូ និងរថយន្តផងដែរ ដោយសារការគ្រោះថ្នាក់ចរាចរណ៍ រវាងរថយន្តម៉ាក FORTUNER បុកអ្នកបើកបរម៉ូតូម៉ាក ហុងដាឌ្រីម ខណៈកំពុងធ្វើដំណើរបញ្រ្ចាស់ទិសគ្នា។
ហេតុការណ៍គ្រោះថ្នាក់ចរាចរណ៍ខាងលើ បានកើតឡើងកាលពីរសៀល ថ្ងៃទី០៣ ខែកក្កដា ឆ្នាំ២០១៧ នៅលើកំណាត់ផ្លូវជាតិលេខ ៥ ត្រង់ចន្លោះបង្គោលគីឡូម៉ែត្រលេខ ១៧៤.១៧៥ ស្ថិតក្នុងភូមិតាកែវលើ ឃុំត្នោតជុំ ស្រុកក្រគរ ខេត្តពោធិ៍សាត់។
ប្រភពព័ត៌មានពីនគរបាលចរាចរណ៍នៃស្នងការដ្ឋាននគរបាលខេត្តបានឲ្យដឹងថា នៅម៉ោងខាងលើគេឃើញរថយន្តបង្កម៉ាក FORTUNER ពណ៏ស ពាក់ស្លាកលេខ ONG 132 2-009 បើកបរដោយឈ្មោះ ហោ សុខជា ភេទប្រុស អាយុ ៣៨ឆ្នាំ សញ្ជាតិខ្មែរ បច្ចុប្បន្ន មានទីលំផ្ទះលេខ ២៨Eo ផ្លូវលេខ ១៩ ស្ថិតក្នុងភូមិទី៣ សង្កាត់ជ័យជំនះ ខណ្ឌដូនពេញ រាជធានីភ្នំពេញ ធ្វើចរាចរណ៍ក្នុងទិសដៅពីកើតឆ្ពោះទៅទិសខាងលិច លុះមកដល់ចំណុចកើតហេតុបានបុកអ្នកបអ្នកបើកបរម៉ូតូម៉ាក ហុងដាឌ្រីម សេ១២៥ សេរីឆ្នាំ២០១៥ ពណ៏ខ្មៅ ពាក់ស្លាកលេខ ពោធិសាត់ 1F 6200 ដែលកំពុងចរាចរណ៍ក្នុងទិសដៅពីខាងជើងឆ្ពោះទៅទិសខាងត្បូងសង្ស័យ(បំរុងឆ្លងផ្លូវ) បណ្ដាលឲ្យបុើងម៉ូតូចូលស្រែ និងរងរួសសន្លប់ស្ដូកស្ដឹង។
ប្រភពព័ត៌មានខាងលើបន្តថា ជនរងរបួសធ្ងន់សន្លប់ស្ដូកស្ដឹងឈ្មោះ ផល ភេទប្រុស អាយុ ២៧ឆ្នាំ សញ្ជាតិខ្មែរ បច្ចុប្បន្ន មានទីលំស្នារាជ ឃុំកំពង់ពោធិ៍ ស្រុកក្រគរ ខេត្តពោធិ៍សាត់។
ប្រភពព័ត៌មានដដែលខាងលើបន្តទៀតថា ភ្លាមៗនោះជនរងគ្រោះរងរបួសសន្លប់ស្ដូកស្ដឹងត្រូវបានគេបញ្ជូនយកទៅសង្រ្គោះ នៅមន្ទីរពេទ្យបង្អែកខេត្តពោធិសាត់ ចំណែកវត្ថុតាងរថយន្ត និងម៉ូតូមន្រ្តីជំនាញយកទៅរក្សាទុក ជាបណ្ដោះអាសន្ននៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ ដើម្បីរងចាំធ្វើការវាសវែង និងដោះស្រាយគ្នាតាមនីតិវិធី៕ បឹុម ពិន
