សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់បើករថយន្តកាមរីបាឡែនបត់ឆ្លងផ្លូវមិន បានប្រុងប្រយ័ត្នជ្រុលទៅម៉ូតូបណ្ដាលឲ្យបុរស២នាក់ រងរបួសមធ្យម រថយន្ត និងម៉ូតូខូចខាតយ៉ាងដំណំ ។
ហេតុការណ៍នេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃទី៣ ខែកក្កដា ឆ្នាំ២០១៧ នៅតាមបណ្ដោយផ្លូវសហពន្ធ័រុស្សី ត្រង់ចំណុចមុខ ក្រសួងការពារជាតិ សង្កាត់វាលវង្ស ខណ្ឌ៧មករា រាជធានីភ្នំពេញ។
យោងបើតាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាកកាមរីបាឡែនពណ៌ ទឹកប្រាក់ពាក់លេខ ភ្នំពេញ 2J-4281 បើកបរដោយស្ត្រីម្នាក់ និងមានកូនតូច២នាក់ ធ្វើដំណើរតាមបណ្ដោយផ្លូវសហពន្ធ័រុស្សីទិសដៅពីកើតទៅលិច ខណៈមកដល់ចំណុចកើតហេតុ រថយន្តបានបត់ឆ្វេងឆ្លងផ្លូវ តែទើបឆ្លងបានពាក់កណ្ដាលផ្លូវ ក៏ស្រាប់តែមានម៉ូតូម៉ាក Wave ពណ៌ខ្មៅមួយគ្រឿង គ្មានស្លាកលេខបើកបរ និងរួមដំណើរបុរស២នាក់ ក្នុងទិសដៅបញ្ច្រាសគ្នា បានជ្រុលមកបុកចំពីមុខបណ្ដាលឲ្យដួលរងរបួសមធ្យមរលាត់ជើង ចំណែករថយន្ត និងម៉ូតូរងការខូចខាតយ៉ាងដំណំ។
ក្រោយកើតហេតុ សមត្ថកិច្ចមូលដ្ឋានបានមកដល់ហើយឲ្យភាគីទាំងពីរចរចាគ្នា ដោយខាងរថយន្តសងទៅខាងម៉ូតូចំនួន៦០ដុល្លារ ដើម្បីបញ្ចប់រឿងនៅនឹងកន្លែងកើតហេតុ ៕ ស រស្មី
