នគរបាលឆ្មក់បង្ក្រាបក្រុមអ្នកជួញដូរនិងប្រើប្រាស់គ្រឿងញៀនបានមនុស្សប្រុសស្រី១០នាក់

ភ្នំពេញ៖ ក្រុមអ្នកជួញដូរ និងប្រើប្រាស់គ្រឿងញៀនប្រុសស្រី១០នាក់ រួមនឹងថ្នាំញៀនចំនួន៦កញ្ចប់ត្រូវបានកម្លាំងនគរបាលព្រហ្មទណ្ឌខណ្ឌសែនសុខបង្ក្រាបបានបន្ទាប់ពីពួកគេទៅប្រមូលផ្តុំគ្នាក្នុងបន្ទប់ជួល។

ករណីបង្ក្រាបក្រុមជនសង្ស័យខាងលើនេះធ្វើឡើងកាលពីវេលាម៉ោង១១និង០០នាទីព្រឹក ថ្ងៃទី៥ ខែកក្កដា ឆ្នាំ២០១៧ នៅចំណុចបន្ទប់ជួលសង្កាត់ទឹកល្អក់១ ខណ្ឌទួលគោក។

លោក យឹម ដាវុធ នាយផ្នែកនគរបាលព្រហ្មទណ្ឌខណ្ឌសែនសុខបានឲ្យដឹងថា មុនដំបូង គឺកម្លាំងសមត្ថកិច្ចបានល្បាត់ក្នុងមូលដ្ឋានហើយក៏ឃាត់ខ្លួនជនសង្ស័យម្នាក់ ក្នុងចំណោម១០នាក់នៅចំណុចផ្លូវ២៧១ សង្កាត់ទឹកថ្លា ដោយជនសង្ស័យមានឈ្មោះ យឹម សំបូ ភេទប្រុស អាយុ៤៧ឆ្នាំ ជិះម៉ូតូ១គ្រឿង ម៉ាកស៊ុយសុីគី វីវ៉ា ពណ៌ខ្មៅ ពាក់ស្លាកលេខ ភ្នំពេញ K1772 ដោយមានការសង្ស័យ ក៏ឃាត់ឆែកឆេរកឃើញថ្នាំញៀន១កញ្ចប់។

លោក នាយផ្នែករូបនេះបន្តទៀតថា ក្រោយមកកម្លាំងសមត្ថកិច្ចបាននាំខ្លួនជនសង្ស័យទៅឆែកឆេរបន្ទប់ជួលដែលគេស្នាក់នៅសង្កត់ទឹកល្អក់​១ ខណ្ឌទួលគោកហើយបានឃើញជនសង្ស័យប្រុសស្រីចំនួន៩នាក់ទៀតកំពុងប្រមូលផ្តុំគ្នាប្រើប្រាស់គ្រៀងញៀនទើបឃាត់ខ្លួនបានទាំងអស់តែម្តង។

សមត្ថកិច្ចនិយាយទៀតថា វត្ថុតាងដែលចាប់យករួមមាន ម្សៅក្រាមថ្លាស ចំនួន៦កញ្ចប់ ជញ្ជើងថ្លឹង១ ម៉ូតូ១គ្រឿងម៉ាកស៊ុយសុីគីវីវ៉ា ពាក់ស្លាកលេខភ្នំពេញ1K1772 និងសម្ភារសម្រាប់ប្រើប្រាស់មួយចំនួនទៀត។

បច្ចុប្បន្នជនសង្ស័យប្រុសស្រីទាំង១០នាក់រួមនឹងវត្ថុតាងកំពុងឃាត់ខ្លួនសាកសួរនៅអធិការដ្ឋាននគរបាលខណ្ឌសែនសុខចាត់ការតាមនីតិវិធី៕
តុង សីហា