សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ មនុស្ស៤នាក់រងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ រថយន្តមិនស្គាល់ម៉ាកបើកបោះពួយយ៉ាងលឿនបុករះម៉ូតូ២គ្រឿងពេញមួយទំហឹង កាលពីវេលាម៉ោង២១ និង៣០នាទី ថ្ងៃទី០៦ ខែកក្កដា ឆ្នាំ២០១៧ នៅលើកំណាត់ផ្លូវជាតិលេខ២១បេ ត្រង់ចំណុចខាងមុខហាងសុភី ស្ថិតក្នុងភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល ។
មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា ជនរងគ្រោះទី១-ឈ្មោះ ឡុញ រី ភេទប្រុស អាយុ៣៨ឆ្នាំ ជាអ្នកបើកបរម៉ូតូម៉ាកគ្រីសអង្គរ ពណ៌ក្រហម ពាក់ស្លាកលេខ កណ្តាល1A-3670 ទី២-ឈ្មោះ ម៉ាត់ ម៉ាលី ភេទស្រី អាយុ៣៨ឆ្នាំ ត្រូវជាប្រពន្ធ ទី៣-ឈ្មោះ ម៉ាលី ហ្សា ភេទស្រី អាយុ៨ឆ្នាំ ត្រូវជាកូន ។ ទាំង៣នាក់នេះមានទីលំនៅភូមិបត្តាជី សង្កាត់ព្រែកហូរ ក្រុងតាខ្មៅទី៤-ឈ្មោះ ជា សាហ៊ុយ ភេទប្រុស អាយុ២១ឆ្នាំ មានទីលំនៅភូមិតាខ្មៅ សង្កាត់តាខ្មៅ ក្រុងតាខ្មៅ ជិះម៉ូតូម៉ាកហុងដាFTR ពណ៌ខៀវ ពាក់ស្លាកលេខ ភ្នំពេញ1BL-8150 ។ ចំណែកឯរថយន្តមិនស្គាល់ម៉ាក ក្រោយពីកើតហេតុបានបើកគេចបាត់ស្រមោល ។
ប្រភពដដែលបានបន្តថា នៅមុនពេលកើតហេតុសាក្សីបានឃើញរថយន្តបង្កមិនស្គាល់ម៉ាកបើកបរតាមបណ្តោយផ្លូវជាតិលេខ២១ ក្នុងទិសដៅពីត្បូងទៅជើងដោយល្បឿនលឿន លុះបើកដល់ចំណុចកើតហេតុបានជ្រុលទៅបុករះម៉ូតូទាំង២គ្រឿងដែលជិះច្រាស់ទិសគ្នាពេញមួយទំហឹង បណ្តាលឲ្យមានអ្នករងរបួសយ៉ាងដូច្នេះ។
ក្រោយពីមានហេតុការណ៍កើតឡើងរថយន្តបង្កបានបើកគេចបាត់ស្រមោល រីឯជនរងគ្រោះត្រូវបានបញ្ជូនទៅសង្រ្គោះនៅមន្ទីរពេទ្យ ។ ដោយឡែកម៉ូតូទាំង២គ្រឿងត្រូវបានសមត្ថកិច្ចនគរបាលក្រុងតាខ្មៅវាស់វែងដកហូត បញ្ជូនទៅរក្សាទុកនៅអធិការដ្ឋាន ដើម្បីចាត់ការតាមច្បាប់ ៕ ស្អាងជ័យ
