សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែតៈ ស្រ្តីម្នាក់បានស្លាប់នៅកន្លែងកើតហេតុ ចំណែក២នាក់ទៀតរងរបួសធ្ងន់ ស្រាល កាលពីម៉ោង២និង២៥នាទីរសៀល ថ្ងៃទី១០ ខែកក្កដា ឆ្នាំ២០១៧ នៅត្រងចំណុចផ្លូវបំបែកជាបី កែងផ្លូវជាតិលេខ៥៨ ស្ទឹងបត់ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ។
នគរបាលផែនសណ្ដាប់ធ្នាប់ចរាចរណ៍ក្រុងប៉ោយប៉ែតប្រាប់ថា ជនរងគ្រោះក្នុងហេតុការណ៍នោះមានឈ្មោះ សុខ ឈឿន ភេទប្រុស អាយុ៥៣ឆ្នាំ មុខរបរប្រជាការពារភូមិ (រងរបួសធ្ងន់) ជាប្ដី ចំណែកប្រពន្ធមានឈ្មោះ យួន ប៉ុក អាយុ៥៥ឆ្នាំ មុខរបរលក់ដូរ (ស្លាប់) និងកូនប្រុសឈ្មោះ រ៉ា វុទ្ធី អាយុ៣ឆ្នាំ រងរបួសស្រាល អ្នកទាំងអស់រស់នៅក្នុងភូមិអូរឫស្សី សង្កាត់ផ្សារកណ្ដាល ក្រុងប៉ោយប៉ែត។
រីឯរថយន្តបង្កម៉ាកLEXUS ពណ៌ស្ករ ចង្កូតស្ដាំ ពាក់ស្លាកលេខ ភ្នំពេញ 2Q-7654 អ្នកបើកបរមានឈ្មោះ ហ៊ុំ ស៊ីយីញ ភេទប្រុស អាយុ៣៣ឆ្នាំមុ ខរបរអ្នករត់តាក់ស៊ី រស់នៅភូមិកុយម៉ែង ឃុំកុយម៉ែង ស្រុកមង្គលបូរី ខេត្តបន្ទាយមានជ័យ។
សមត្ថកិច្ចបញ្ជាក់ថា មុនកើតហេតុ ជនរងគ្រោះជាប្ដីជិះម៉ូតូម៉ាកឌ្រីមសង់ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ បន្ទាយមានជ័យ 1F.5673 បានដឹកប្រពន្ធកូនពីទិសខាងលិចទៅកើត ស្របទិសជាមួយរថយន្ត លុះដល់កន្លែងហេតុ ជនរងគ្រោះបានបត់ម៉ូតូពីមុខរថយន្តឆ្លងផ្លូវទៅខាងឆ្វេងដៃមិនប្រយ័ត្ន ក៏ត្រូងរថយន្តបុកខ្ទាតម៉ូតូធ្លាក់ប្រឡាយ បណ្ដាលឲ្យប្រពន្ធស្លាប់នៅនឹងកន្លែង រីឯប្ដីរងរបួសធ្ងន់ ចំណែកកូនរួមដំណើរជាមួយរងរបួសស្រាល។
ក្រោយកើតហេតុ ជនរងគ្រោះជាប្ដី និងកូនត្រូវសមត្ថកិច្ចជួយអន្តរាគមន៏ដឹកទៅជួយសង្គ្រោះបន្ទាន់នៅមន្ទីរពេទ្យបង្អែកក្រុង ចំណែកសពប្រពន្ធត្រូវក្រុមសាច់ញ្ញាតិដឹកយកទៅធ្វើបុណ្យភូមិកំណើត ។
ចំណែករថយន្តបង្កខូចខាតបែកកញ្ចក់មុខខាងស្ដាំ និងម៉ូតូខូចខាតយ៉ាងដំណំត្រូវកម្លាំងសមត្ថកិច្ចដឹកយកមករក្សារទុកនៅកន្លែងការដ្ឋាននគរបាល ក្រុងប៉ោយប៉ែតដើម្បីដោះស្រាយតាមផ្លូវច្បាប់៕ វណ្ណា
