សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ រដ្ឋបាលស្រុកស្ទឹងហាវ បានថ្លែងឲ្យដឹងបន្ថែមពាក់ព័ន្ធនឹងគ្រោះធម្មជាតិ នៅថ្ងៃទី១៧ ខែកក្កដា ឆ្នាំ២០១៧ថា ករណីគ្រោះធម្មជាតិខ្យល់កន្ត្រាក់បណ្តាលឲ្យលិចទូកនេសាទ៣គ្រឿងទៀត និងមានកម្មករទូកនេសាទ៤នាក់ធ្លាក់បាត់ពីលើទូក។
សមត្ថកិច្ចបញ្ជាក់ថា ទូកដែលលិចរួមមាន៖ ទូកមងក្ដាមប្រភេទ BE ម៉ាស៊ីនគោយន្ត ទទឹង២,៥ម៉ែត្រ បណ្ដោយ១១ម៉ែត្រ លិចនៅចំណុចក្រៅថ្មរៀង នៅលើទូកនេះមានមនុស្ស៥នាក់ ម្ចាស់ទូកឈ្មោះ អេង ហួង ភេទស្រី អាយុ៤៥ឆ្នាំ មុខរបរនេសាទ ទីលំនៅក្រុម៥ ភូមិ១ ឃុំទំនប់រលក ស្រុកស្ទឹងហាវខេត្តព្រះសីហនុ ។
ករណីខាងលើនេះ បណ្តាលឲ្យបាត់មនុស្សម្នាក់ជាក្មួយម្ចាស់ទូកឈ្នោះ អេង តុង ភេទប្រុស អាយុ១៨ឆ្នាំ មុខរបរកម្មករនេសាទ ទីលំនៅក្រុម៤ ភូមិ១ ឃុំទំនុបរលក ស្រុកស្ទឹងហាវ ខេត្តព្រះសីហនុ ។ បច្ចប្បន្នទូក និងមនុស្សមិនទាន់រកឃើញនៅឡើយ ។
ទូកមងក្ដាម ប្រភេទ កន្ទុយវែង ទទឹង២,១០ម៉ែត្រ បណ្ដោយ១១ម៉ែត្រ លិចនៅចំណុច ពយយាយម៉ី ចម្ងាយ២ម៉ាយ ។ ម្ចាស់ទូកឈ្មោះ ខេង ណាង ភេទប្រុស អាយុ២៩ឆ្នាំ មុខរបរនេសាទ ទីលំនៅ ក្រុម៧ ភូមិ១ ឃុំទំនប់រលក ស្រុកស្ទឹងហាវខេត្តព្រះសីហនុ ។ ករណីនេះមិនបណ្ដាលឲ្យបាត់បង់ជីវិតមនុស្សទេ ។ ទូកត្រូវបានសាច់ញាតិជួយអូសមករក្សាទុកនៅព្រែករ៉ុងរាំង ។
ទូកនេសាទម៉ាស៊ីនគោយន្ដមួយគ្រឿង លិចនៅចំណុច អាវឡាតាន់ ឃុំព្រែកខ្សាច់ ស្រុកបុទុមសាគរ ខេត្តកោះកុង ។ ទូកមានទំហំ ទទឹង២,៨ម៉ែត្រ បណ្ដោយ១១ម៉ែត្រ លើទូកមានមនុស្ស៣នាក់ ។ ម្ចាស់ទូកឈ្មោះ សេង សន ភេទប្រុស អាយុ៣៥ឆ្នាំ មុខរបរនេសាទ មានទីលំនៅក្រុម៤ ភូមិ២ ឃុំទំនប់រលក ស្រុកស្ទឹងហាវ ខេត្តព្រះសីហនុ ។ ករណីខាងលើបណ្ដាលឲ្យបាត់ខ្លួនមនុស្ស២នាក់ ។
ករណីមនុស្សម្នាក់ធ្លាក់ពីលើទូកម៉ាស៊ីនគោយន្តពេលកំពុងនេសាទ នៅចំណុច អាវឡាតាន់ ឃុំព្រែកខ្សាច់ ស្រុកបុទុមសាគរ ខេត្តកោះកុង ។ ជនរងគ្រោះមានឈ្មោះ ជ័យ គួន ភេទប្រុស អាយុ៤០ឆ្មាំ មុខរបរកម្មករនេសាទ មានទីលំនៅក្រុម១៣ ភូមិ៣ ឃុំទំនប់រលកស្រុកស្ទឹងហាវ ខេត្តព្រះសីហនុ ។ ម្ចាស់ទូកឈ្នោះ ឆាយ ប្រុស អាយុ៣៧ឆ្នាំ មុខរបរនេសាទ មានទីលំនៅក្រុម១៦ ភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ។
បច្ចប្បន្ន ជនរងគ្រោះត្រូវបានសាច់ញាតិកំពុងស្វែងរក៕ ឆ្លាម សមុទ្រ
