កីឡាករអឺរ៉ុប៩រូបដែលបដិសេធមិនផ្ទេរទៅលេងនៅចិន

1-Arjen Robben
កំពូលខ្សែប្រយុទ្ធស្លាបជំនាញប្រើជើងឆ្វេងសញ្ជាតិហុល្លង់ដែលមានល្បឿនលឿនរូបនេះ បានក្លាយជាកីឡាករដ៏សំខាន់របស់ក្រុម Bayern Munich ក្រោយលាឈប់ពីក្រុមជម្រើសជាតិ។ ខ្សែប្រយុទ្ធររូបនេះបានបដិសេធសំណើផ្ទេរទៅលេងនៅក្លិបកំពូល នៅប្រទេសចិន បើទោះបីជាទទួលបានប្រាក់ឈ្នួលច្រើនយ៉ាងណាក៏ដោយ មូលហេតុគឺគាត់ចង់បញ្ចប់អាជីពជាមួយក្រុមយក្សអាល្លឺម៉ង់ Bayern Munich តែមួយប៉ុណ្ណោះ ហើយអតីតកីឡាករក្រុម Chelsea និង Real Madrid រូបនេះទើបតែបន្តកិច្ចសន្យាជាមួយក្រុម រយៈពេល១ឆ្នាំទៀតជាមួយ Bayern Munich ផងដែរ ។

2- John Terry
អតីតប្រធានក្រុម Chelsea និងជាកីឡាករខ្សែការពារក្រុមជម្រើសជាតិ អង់គ្លេសវ័យ៣៧ឆ្នាំរូបនេះ គិតត្រឹមរដូវក្តៅ២០១៧នេះ គឺលេងឲ្យក្លិបតែមួយប៉ុណ្ណោះពីឆ្នាំ(1998-2017)មួយប៉ុណ្ណោះ ក្រោយការបង្ហាញខ្លួនបាន៧១៧ប្រកួត ប៉ុន្តែជាចុងក្រោយ Terry បានសម្រេចចិត្តទៅចូលរួមជាមួយក្រុម Aston Villa នៅក្របខ័ណ្ឌអង់គ្លេស Championship កាលពីពេលថ្មីៗនេះ ។
ក្រោមការដឹកនាំរបស់គ្រូបង្វឹកថ្មីលោកConte កីឡាករខ្សែការពារកណ្តាលរូបនេះ មិនបានបង្ហាញទម្រង់លេងបានល្អតាមប្រព័ន្ធដឹកនាំរបស់គ្រូបង្វឹកសញ្ជាតិអ៊ីតាលី ទើបធ្វើឲ្យរូបគេសម្រេចចិត្តចាកចេញពីក្រុមក្រោយជួយឲ្យ Chelsea លើកពានអង់គ្លេស Premier League ៤សម័យកាលកន្លងមក។ មានក្លិបធំៗនៅសហរដ្ឋអាមេរិក និងប្រទេសចិន គឺអតីតគ្រូបង្វឹក Luis Felip Scolari ចាប់អារម្មណ៍ចង់បានរូបគេទៅចូលរួមនៅក្លិប Guangzhou Evergrande ប៉ុន្តែរូបគេសម្រេចចិត្តបន្តលេងនៅស្រុកកំណើតបន្តទៀត ។

3-Zlatan Ibrahimovic
កំពូលខ្សែប្រយុទ្ធឆ្នើមឈានចូលវ័យ៣៥ឆ្នាំសញ្ជាតិស៊ុយអែតរូបនេះបានផ្ទេរពីក្រុម Paris Saint Germain មកចូលរួមជាមួយក្រុមបិសាចក្រហម Man United កាលពីរដូវកាលមុនដោយគ្មានតម្លៃខ្លួននិងបានជួយក្រុមលើកពាន EFL ព្រមជាមួយពាន Europa League ក្នុងមួយរដូវកាលផងដែរ។ ប៉ុន្តែមុនបញ្ចប់រដូវកាល 2016-2017 ខ្សែប្រយុទ្ធរូបនេះបានរងរបួស ប៉ុន្តែបានតាំងចិត្តបន្តលេងដោយមិនព្រមចូលនិវត្តន៍ ហើយបានទទួលសំណើពីក្រុមនៅសហរដ្ឋអាមេរិក និង នៅប្រទេសចិនផងដែរ ទីបំផុត កីឡាករដែលមានប្រវត្តិលេងឲ្យក្លិបច្រើនបំផុតមួយនេះ បានសម្រេចបន្តស្នាក់នៅ និង ត្រៀមលេងឲ្យក្រុមនៅតំបន់អឺរ៉ុបបន្តទៀត ។

4-Olivier Giroud
ខ្សែប្រយុទ្ធក្រុមជម្រើសជាតិបារាំង និងបច្ចុប្បន្ន កំពុងលេងឲ្យក្រុមកាំភ្លើងធំ ArsenaLកីឡាករ Olivier Giroud បានក្លាយជាជម្រើសទី១របស់គ្រូបង្វឹក Arsene Wenger ព្រមទាំងបានជួយក្រុមជាច្រើន ប៉ុន្តែមានក្លិបនៅប្រទេសចិនបានដាក់សំណើចង់បានរូបគេទៅលេងនៅទីនោះ។ ជាមួយការឆ្លើយតបវិញយ៉ាងខ្លីអតីតខ្សែប្រយុទ្ធក្រុម Olympic Marseille រូបនេះ បាននិយាយថា ខ្ញុំនៅតែស្មោះត្រង់ជាមួយក្រុម ខ្ញុំចង់ឈ្នះពាន និងអ្វីដែលល្អជាមួយArsenal និងអ្នកគាំទ្រ។ ក្រោយការមកដល់របស់ខ្សែប្រយុទ្ធ និង ជាមិត្តរួមសញ្ជាតិកីឡាករ Lacazette អាចនិងធ្វើឲ្យឱកាសចូលលេងរបស់ Giroud និងថមថយចុះ ប៉ុន្តែរូបគេនៅតែតាំងចិត្តបន្តលេងនៅពហុកីឡដ្ឋាន Emirate Stadium ជានិច្ច។

5-Klaas-Jan Huntelaar
អតីតខ្សែប្រយុទ្ធក្រុមជម្រើសជាតិហុល្លង់វ័យ៣៣ឆ្នាំរូបនេះ បានបង្ហាញទម្រង់លេង យ៉ាងល្អនៅក្រុមជម្រើសជាតិ បន្ទាប់ពីមិត្តរួមជាតិ Ruud Van NiStelrooy និង Arjen Robbenទោះបីមានរាងជ្រេបន្តិចមែនប៉ុន្តែក្រោយបញ្ចេញសមត្ថិភាពស៊ុតបញ្ចូលទីបាន៤៨ គ្រាប់ក្នុងមួយរដូវកាលជាមួយក្រុម Schalke រួចមក មានក្រុមជាច្រើន នៅលីកកំពូលប្រទេសចិន ចាប់អារម្មណ៍ចង់បានរូបគេទៅរួមក្រុម ប៉ុន្តែទីបំផុតអតីត ខ្សែប្រយុទ្ធក្រុមReal Madrid រូបនេះបានសម្រេចចិត្តត្រលប់ទៅលេងនៅក្រុម Ajax នៅស្រុកកំណើតវិញ។

6-Cesc Fabregas
ខ្សែបម្រើដ៏មានឥទ្ធិពលរបស់ក្រុមជម្រើសជាតិអេស្បាញ និងក្រុមតោខៀវChelsea រូបនេះ
ឈានចូលដល់វ័យ៣០ឆ្នាំហើយ មានក្លិបធំមួយនៅប្រទេសចិន បានផ្តល់តម្លៃប្រមាណ ៣១លានយូរ៉ូដល់ដើម្បីចង់បានរូបគេ ប៉ុន្តែអតីតកីឡាករក្រុមBarcelona និងArsenal រូបនេះមានជំនឿថា គ្រូបង្វឹក Conte និង ផ្តល់ឱកាសឲ្យរូបគេបានចូលលេងជម្រើស១១នាក់ ដំបូងច្រើនជាងរដូវកាលមុន។

7-Wayne Rooney
ក្រោយផ្ទេរពីក្រុមEvertonកាលពី១៣ឆ្នាំមុន មកចូលរួមជាមួយបិសាចក្រហម Man United និង បានជួយក្រុមឲ្យឈ្នះពានអង់គ្លេស Premier League, Champion League, និងពាន Europa League ខ្សែប្រយុទ្ធចាស់វស្សាររូបនេះបានសម្រេចចិត្តមិនជ្រើសរើសការផ្ទេរទៅលេងនៅលីកកំពូលចិន ប៉ុន្តែបានត្រលប់ទៅលេងក្លឹបចាស់គឺក្រុម Evertonវិញ។
អ្នកចាត់ការទូទៅក្រុមTianjin Quanjian និងជាអតីតខ្សែការពារក្រុមជម្រើសជាតិអ៊ីតាលី បានធ្លាប់ចរចាក្នុងការនាំយក Rooney ទៅលេងនៅក្លិបដែលខ្លួនកំពុងដឹកនំា នៅក្នុងតម្លៃខ្លួន៣២លានផោន និងប្រាក់ពលកម្មដ៏ច្រើនសន្ធឹកសន្ធាប់ ប៉ុន្តែទីបំផុត Rooneyសម្រេចបន្តលេងនៅក្របខ័ណ្ឌអង់គ្លេស Premier League ក្នុងគោលបំណងមានកៅអីមួយបានលេងឲ្យក្រុមជម្រើសជាតិអង់គ្លេសបន្តទៀត។

8-Karim Benzema
ខ្សែប្រយុទ្ធក្រុមReal Madrid រូបនេះ បន្ទាប់ពីរដូវកាលចាស់មិនសូវបានបង្ហាញទម្រង់លេង លេចធ្លោនិងចូលលេងបានតែ១៩ប្រកួត ជាក់ស្តែងដូចជា៥រដូវកាលមុន គឺខ្សែប្រយុទ្ធជម្រើសជាតិបារាំងរូបនេះ រកគ្រាប់បាល់មិនតិចជាង២៥ គ្រាប់ទេក្នុងមួយរដូវកាល។ មូលហេតុនេះធ្វើឲ្យBenzema បានក្លាយជាប្រធានបទ របស់ក្រុមនៅលីកកំពូលចិនគឺក្លិប Tianjin Quanjian ក្នុងការនាំយករូបគេមកពង្រឹងក្រុម នៅក្នុងតម្លៃ២១លានយូរ៉ូ ប៉ុន្តែកិច្ចសន្យារបស់គេជាមួយក្លិបមានរហូតដល់ឆ្នាំ២០១៩ ខណៈដែលសាមីខ្លួនតាំងចិត្តបន្តលេងឲ្យក្រុមបន្តទៀត។

9-Yaya Toure
ខ្សែបម្រើក្រុមជម្រើសជាតិកូដឌីវ័រ និងរបស់ក្រុម Man City ក្រោយជួយក្រុមលើកពាន អង់គ្លេស Premier League ២រដូវកាលបន្ទាប់ពីចាកចេញពីក្រុម Barcelona រួចមក សម្រាប់រដូវកាលចាស់(2016-2017)មិនសូវបានចូលលេងជម្រើស១១នាក់ដំបូងនោះទេ ជាហេតុធ្វើឲ្យក្លិបនៅចិន(មិនបានបញ្ចេញឈ្មោះ)បានដាក់សំណើប្រាក់ពលកម្មនឿយហត់ ប្រមាណ៤៣០.០០០ផោន ប៉ុន្តែកីឡាកររូបនេះមិនទាន់សម្រេចចិត្តថានឹងចាកចេញពីអឺរ៉ុបទៅ លេងនៅចិននៅឡើយទេ ៕ ដេវីត