សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្សយ័២នាក់បានធ្វើសកម្មភាព ឆក់យកកាបូបស្ពាយពីនារីម្នាក់កំពុងតែជិះម៉ូតូធ្វើដំណើរតាមផ្លូវ បានសម្រេច ធ្វើឲ្យនារីរូបនោះដួលម៉ូតូរងរបួសធ្ងន់ ឯក្រុមជនសង្ស័យនាំគ្នាជិះម៉ូតូគេចខ្លួនបាត់ ។
ហេតុការណ៍នេះកើតឡើង កាលពីវេលាម៉ោង៨យប់ថ្ងៃទី១៤ ខែសីហា ឆ្នាំ២០១៧ ទល់មុខនឹងស្ថានីយប្រេងឥន្ធនៈតូតាល់ ផ្លូវ២៧១ សង្កាត់បឹងទំពុន ខណ្ឌមានជ័យ ហើយនារីរងគ្រោះមិនទាន់ស្គាល់អត្តសញ្ញាណនៅទេ គ្រាន់តែដឹងថា មានអាយជាង២០ឆ្នាំ និងជិះម៉ូតូម៉ាកហុងដាវ៉េវ ពណ៌ខ្មៅ ពាក់ស្លាកលេខ ភ្នំពេញ 1FQ-4558 តែប៉ុណ្ណោះ។
សាក្សីបានឲ្យដឹងថា មុនពេលកើតហេតុ គេបានឃើញនារី រូបនោះបានជិះម៉ូតូម៉ាកហុងដាវ៉េវ ពណ៌ខ្មៅ ធ្វើដំណើរតាមបណ្តោយផ្លូវលេខ២៧១ ក្នុងទិសដៅ ពីជើងទៅត្បូង តែមិនដឹងថាគោលបំណងទៅណានោះទេ។ ខណៈមកដល់ចំណុចកើតហេតុស្រាប់តែលេចមុខជនសង្សយ័២នាក់ ជិះម៉ូតូមួយគ្រឿង មិនចាំម៉ាក បានជិះមកជិតរួចហើយបានធ្វើសកម្មភាពឆក់យកកាបូបស្ពាយពីនារីរងគ្រោះបានសម្រេច ជាហេតុធ្វើឲ្យនារីរូបនោះដួលម៉ូតូ បោកក្បាលទៅនឹងថ្នល់រងរបួសធ្ងន់រហូត សន្លប់ស្តូកស្តឹង។ ឯក្រុមជនសង្ស័យ បានបើកម៉ូតូគេចខ្លួនបាត់ដោយសុវត្ថិភាព ហើយចំពោះរបស់របរក្នុងកាបូបនោះមិនទាន់ដឹងថាមានអ្វីខ្លះនោះទេ ពីព្រោះជនរងគ្រោះមិនទាន់ដឹងខ្លួននៅឡើយ គ្រាដែលរថយន្តសង្គ្រោះដឹកជនរងគ្រោះទៅគ្លីនិកឯកជនហុង ហាក់ ធ្វើការសង្រ្គោះភ្លាមៗ ៕ ប្រាថ្នា
