សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀងៈ បុរសម្នាក់បានរងរបួសបែកក្បាលហូរឈាមគួរឲ្យរន្ធត់ និងសន្លប់ស្ដូកស្ដឹង នឹងកន្លែង ខណៈបើកបរក្នុងល្បឿនលឿនខ្វះប្រុងប្រយ័ត្នទៅបុក នឹងរថយន្តដឹកស៊ីម៉ង់ត៍ពីក្រោយ ដែលខូចឈប់ចតស្របទិសគ្នាពេញទំហឹងលាន់សូរដូចរន្ទះផ្អើលអស់អ្នកភូមិ ក៏ដូចជាអ្នកធ្វើដំណើរឆ្លងកាត់ឈប់មើល និងរាយការណ៍មកសមត្ថកិច្ចមូលដ្ឋាន។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២រសៀល ថ្ងៃទី ១៧ ខែសីហា ឆ្នាំ២០១៧ លើផ្លូវលេខជាតិលេខ១ ចន្លោះគីឡូម៉ែត្យ១៤២ និង១៤៣នៅចំណុច ភូមិ ដើមពោធិ៍ ឃុំ ស្វាយតាយាន ស្រុកកំពង់រោទិ៍ ខេត្ត ស្វាយរៀង។
យោងតាមសមត្ថកិច្ចនគរបាលស្រុកបានឲ្យដឹងថា បុរស ដែលរងរបួសធ្ងន់មានឈ្មោះ ប៉ែន ស៊ីន អាយុ ២៦ឆ្នាំ មុខរបរ កម្មករ រស់នៅភូមិ កគ្រួស ឃុំ ជ្រៃធំ ស្រុកកំពង់រោទិ៍ ខេត្តស្វាយរៀងដោយជិះម៉ូតូមួយគ្រឿង ម៉ាក ហុងដាឌ្រីម ស៊េរីឆ្នាំ២០១៥ ពណ៌ ខ្មៅពាក់ ស្លាកលេខ ស្វាយរៀង ១H ៣៨០១ខូចខាតផ្នែកតួខាងមុខយ៉ាងដំណំ។
ចំណែកអ្នកបើករថយន្តដឹកស៊ីម៉ង់ត៍ ដែលខូចឈប់ចតលើផ្លូវក្រោយកើតហេតុដោយមើលទៅឃើញសភាពការណ៍បែបមិនស្រួលដាក់ មេប្រូចបាត់ស្រមោល បន្សល់តែរថយន្តកូរ៉េ ម៉ាក ហ៊ីយ៉ានដាយ ពណ៌ ស ពាក់ស្លាកលេខ ស្វាយរៀង 3A 13443801 ផ្ទុកស៊ីម៉ង់ត៍ពេញនៅ នឹងកន្លែង។
តាមអ្នកភូមិបានឲ្យដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០១៥ ពណ៌ ខ្មៅដោយធ្វើដំណើរទិសដៅពីលិច ទៅកើតខណៈនោះសង្ស័យមិនដឹងយ៉ាងម៉េចស្រាប់តែទៅបុក និងរថយន្តខូច ដែលឈប់ចតនៅលើផ្លូវស្របទិសគ្នាយ៉ាងពេញទំហឹងលាន់ដូចរន្ទះបង្កឲ្យមានការភ្ញាក់ផ្អើលតែម្ដង។
បន្ទាប់មក អ្នកភូមិបានរាយការណ៍មកសមត្ថកិច្ចមូលដ្ឋានមកកន្លែងកើតហេតុ យកជនរងគ្រោះទៅកាន់មន្ទីរពេទ្យ និងវាស់វែងម៉ូតូ និងរថយន្តមកកាន់អធិការនគរបាលស្រុកស្វាយទាបចាត់ការតាមច្បាប់៕ យឹម សុថាន
