សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យុវជន២នាក់បានរងរបួសធ្ងន់ បែកក្បាលបាក់ជើង ខណៈដែលជួបករណីគ្រោះថ្នាក់ចរាចរណ៍ដោយជិះម៉ូតូមិនគោរពសិទ្ធិអាទិភាពឆ្លងកាត់ផ្លូវបំបែកជា៤ទៅបុកនឹងរថយន្តហ៊ីយ៉ាន់ដាយ ពីត្បូងទៅជើងយ៉ាងពេញទំហឹងរួចអូសផ្ទប់ទៅនឹងដើមឈើលាន់សូរដូចរន្ទះ កាលពីវេលាម៉ោង៥ និង៥០នាទីល្ងាច ថ្ងៃទី២៤ ខែសីហា ឆ្នាំ២០១៧ លើផ្លូវបំបែកលេខ ៣១៤ ស្ថិតនៅភូមិ ស្រះ វង់ សង្កាត់ ស្វាយរៀង ក្រុង ស្វាយរៀង។
យោងតាមសមត្ថកិច្ចនគរបាលខេត្តស្វាយរៀងបានឲ្យដឹងថា យុវជនដែលជិះម៉ូតូដែលរងរបួសធ្ងន់មានឈមោះ ឆន វាសនា អាយុ ១៩ ឆ្នាំ មុខរបរ សិស្ស រស់នៅភូមិ ស្រម៉ ឃុំ បុសមន ស្រុក រំដួល ខេត្ត ស្វាយរៀង និងអ្នករួមដំណើរឈ្មោះ ទឹម សោភ័ណ្ឌ អាយុ ១៨ ឆ្នាំ មុខរបរ សិស្ស រស់នៅភូមិ បុសផ្លាំង ឃុំ បុសមន ស្រុក រំដួល ខេត្ត ស្វាយរៀង ខណៈបើកបរម៉ូតូម៉ាក្ស ស្កូបពី ពណ៍ ស ពាក់ស្លាកលេខ ស្វាយរៀង ១G ៣៣៤៩ ខូចខាតទាំងស្រុង។
ចំណែកអ្នកបើកបររថយន្តមានឈ្មោះ វ៉ាន់ សាវ៉ាត់ ភេទ ប្រុស អាយុ ២៨ ឆ្នាំ មុខរបរ លក់ដូរ រស់នៅ ភូមិ ឃ្លាំង ឃុំ ពោធិរាជ ស្រុក ស្វាយជ្រំ ខេត្ត ស្វាយរៀង និងអ្នករួមដំណើរឈ្មោះ ម៉ៅ ឌី ភេទ ប្រុស អាយុ ២៨ ឆ្នាំ មុខរបរ លក់ដូរ រស់នៅភូមិឃុំជាមួយគ្នា ។
បើតាមសាក្សីបានឲ្យដឹងថា មុនកើតហេតុគឺមានភ្លៀងធ្លាក់យ៉ាងខ្លាំង ខណៈនោះមានម៉ូតូមួយគ្រឿងម៉ាកស្កូបពី ពណ៍ ស ពាក់ស្លាកលេខ ស្វាយរៀង ១G ៣៣៤៩ជិះគ្នា២នាក់ដោយធ្វើដំណើរពីលិចទៅកើតមិនគោរពសិទ្ធិអាទិភាពហើយមកដល់ផ្លូវបំបែកជា៤ស្រាប់តែមាន រថយន្ដម៉ាក្ស ហុីយ៉ាន់ដាយ ពណ៍ ខៀវ ស ពាក់ផ្លាកលេខ ភព ២.ធ.០៤៩១ បើកបរដោយបុរសម្នាក់ និងមានអ្នករួមដំណើរម្នាក់ដែលធ្វើដំណើរក្នុងទិសដៅពីត្បូងទៅជើង ក៏បុកគ្នាពេញទំហឹងលាន់សូរដូចរន្ទះ ហើយក៏អូសផ្ទប់ទៅនឹងដើមស្ងាវមុខស្នងការដ្ឋាននគរបាលខេត្តស្វាយរៀងតែម្ដង។
ក្រោយមកប្រជាពលរដ្ឋ និងអ្នកធ្វើដំណើរបានរាយការណ៍មកសមត្ថកិច្ចមូលដ្ឋានអន្តរាគមន៍ដឹកយុវជនដែលរងរបួសទាំង២នាក់មកកាន់មន្ទីពេទ្យបង្អែកខេត្តព្រមទាំងវាស់វែង និងអូសម៉ូតូ និងរថយន្តព្រមទាំងអ្នកបើកបរមកកាន់ការិយាល័យនគរបាលចរាចរណ៍ខេត្តស្វាយរៀងចាត់ការបន្តតាមច្បាប់ ៕ យឹម សុថាន
