សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ ម៉ូតូមួយគ្រឿង ដែលអ្នកបើកបរមានការធ្វេសប្រហេសតែមួយភ្លែត ដោយបញ្ជាម៉ូតូរបស់ខ្លួនបត់ឆ្វេងមិនបានមើលមុខ ក៏ត្រូវម៉ូតូមួយគ្រឿងទៀត ដែលបើកបញ្ច្រាសទិសគ្នាបុកយ៉ាងពេញទំហ៊ឹងបណ្តាលឲ្យរងរបួសមានធ្ងន់មានស្រាលទាំងសងខាង ។
ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង៦និង៥០នាទីព្រឹក ថ្ងៃទី៣០ ខែសីហា ឆ្នាំ២០១៧ ស្ថិតនៅលើផ្លូវខេត្តលេខ២១ ក្នុងភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ ។
តាមការឲ្យដឹងពីសមត្ថកិច្ចចរាចរណ៍ក្រុងដូនកែវបានប្រាប់អោយដឹងថា ម៉ូតូទាំង២គ្រឿង ដែលបុកគ្នានេះ ទី១.ម៉ាកហុងដាសេ១២៥ ពណ៌ខ្មៅ សេរី២០១៧ ពាក់ស្លាកលេខ តាកែវ 1M-7610 បើកបរដោយឈ្មោះ ម៉ាច ទិត្យ ភេទប្រុស អាយុ២៩ឆ្នាំ រស់នៅភូមិរវៀង ឃុំសំបួរ ស្រុកទ្រាំង ខេត្តតាកែវ រងរបួសស្រាល និងមានអ្នករួមដំណើរម្នាក់ឈ្មោះ ផេង សំបូរ ភេទស្រី អាយុ២៦ឆ្នាំ រស់នៅភូមិឃុំជាមួយគ្នា រងរបួសស្រាល ។ ចំណែកម៉ូតូមួយគ្រឿងទៀតម៉ាក ហុងដាសេ១២៥ពណ៌ខ្មៅ សេរី២០១៤ ពាក់ស្លាកលេខ ភ្នំពេញ 1CG-7915 បើកបរដោយឈ្មោះ ចាន់ មុន្នី ភេទប្រុស អាយុ១៥ឆ្នាំ រស់នៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែ របួសធ្ងន់ដោយបាក់ជើងម្ខាង។
ចំណែកប្រជាពលរដ្ឋ ដែលឃើញហេតុការបានឲ្យដឹងដែរថា មុនពេលកើតហេតុពួកគាត់ឃើញម៉ូតូមួយគ្រឿងជិះគ្នា២នាក់ បើកបរពីទិសខាងកើតទៅទិសខាងលិច លុះមកដល់ចំណុចកើតហេតុក៏ឃើញម៉ូតូមួយគ្រឿងទៀត ដែលបើកបរច្រាស់ទិសគ្នាបត់ឆ្វេងកាត់ពីមុខ ក៏ត្រូវម៉ូតូ ដែលកំពុងបើកត្រង់បុកពេញទំហឹងបណ្ដាលឲ្យអ្នកជិះម៉ូតូបត់ឆ្វេងខាងលើនេះរងរបួសធ្ងន់ដោយបាក់ជើងម្ខាងតែម្តងទៅ។
ក្រោយពេលកើតហេតុអ្នករងរបួសទាំង៣នាក់ត្រូវបានបញ្ជូនទៅកាន់មន្ទីរពេទ្យបង្អែកខេត្តតាកែវដើម្បីជួយសង្គ្រោះ ចំណែកម៉ូតូទាំងទាំងពីរគ្រឿងត្រូវបានសមត្ថកិច្ចក្រុងដូនកែវរក្សាទុកសម្រាប់ធ្វើការដោះស្រាយគ្នានៅពេលក្រោយ៕ ភ្នំដា
