សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ៖ ក្រុមពលរដ្ឋកាប់ឈើគ្រញូង បានរិះគន់ទៅលើ លោក រៀម ខេត មេវរៈ៤០៥តំបន់ប្រតិបត្តិការសិករងខេត្តព្រះវិហារប្រចាំកានៅទិសជួរមុខស្រុកជាំក្សាន្ត ចាប់ឈើរបស់ពួកគាត់ រួចប្រុងស៊ីដាច់ឈើដោយមិនអោយជំនាញមេព្រៃដឹងលឺ។
ប្រជាពលរដ្ឋដែលចូលទៅកាប់ឈើគ្រញូងខុសច្បាប់នៅក្នុងទឹកដីថៃ បានឲ្យដឹងថា លោក រៀម ខេត មេវរៈ៤០៥ បានស្ទាក់ចាប់ឈើរបស់ពួកគាត់ ដែលមានគ្នាចំនួន27នាក់ នៅចំណុចភូមិឈើទាលគង ស្រុកជាំក្សាន្ត កាលពីវេលារសៀលថ្ងៃទី០៦ ខែកញ្ញា ឆ្នាំ២០១៧។ ក្នុងពេលបង្ក្រាបនោះ លោក រៀម ខេត និងកូនចៅរបស់លោក បានបំរុងស៊ីដាច់ឈើ ដោយមិនអោយជំនាញ ឬមេព្រៃដឹងលឺទេ។
ក្រុមប្រជាពលរដ្ឋបន្តថា ក្នុងករណីបង្ក្រាបខាងលើ ឈើដែលពួកគាត់ចូលទៅស្ពាយនោះ មានរហូតដល់ទៅ27ក តែក្រោយពេលវរះ៤០៥បង្ក្រាប ស្រាប់តែបាត់ឈើចំនួន៣សម្ពៀយ ដែលមានមុខកាត់ធំៗហើយមានតំលៃខ្ពស់ទៀតផង។ រឿងនេះពួកគាត់ចោតថាកុំកន្ទេលធំបន្លំដេក បើចាប់ហើយត្រូវយកឈើទាំងនោះមកប្រគល់អោយសមត្ថកិច្ចជំនាញអោយគ្រប់ចំនួន ទើបត្រូវ។
ប្រជាពលរដ្ឋបន្តទៀតថា មួយរយៈកន្លងមក រាល់ពេលពួកគាត់ចូលទៅកាប់ឈើគ្រញូងតែបង់ទៅអោយកូនចៅមេវរៈ៤០៥ ឈរជើងក្នុងចំណុចខាងលើ ក្នុងមួយសំពាយ45000៛ ទើបចូលកាប់នឹងស្ពាយបានឈើទាំងនោះរួច បើមិនបង់ទេនឹងត្រូវកម្លាំងរបស់លោកចាប់យកទៅលក់ ដោយមិនប្រគល់ទៅអោយមេព្រៃទេ។
ពាក់ព័ន្ឋករណីនេះ លោក រៀម ខេត មេវរៈ៤០៥តំបន់ប្រតិបត្តិការសិករងខេត្តព្រះវិហារប្រចាំការ នៅទិសជួរមុខស្រុកជាំក្សាន្ត បានអោយដឹងតាមទូរសព្ទ័ថា ប្រជាពលរដ្ឋចេះតែថា ហើយវាជាពាក្យចចាមអារ៉ាម ទេ ចំពោះកម្លាំងរបស់លោក លោកមិនឲ្យមានការយកលុយបទល្មើសទេ គឺមានតែចាប់។ ហើយចំពោះរឿងថាកម្លាំងរបស់លោកប្រុងស៊ីដាច់ឈើប្រជាពលរដ្ឋ ក៏គ្មានដែរ លោកមិនធ្វើខុសតាមបទបញ្ជាទេ។
គួរបញ្ជាក់ថាឈើគ្រញូងដែលកម្លាំងសមត្ថកិច្ចបង្ក្រាបបាននោះ មានចំនួន 1317គីឡូក្រាម ស្មើនឹង245ដុំ។ បច្ចប្បន្នឈើទាំងនេះត្រូវបានសមត្ថកិច្ចជំនាញផ្នែកជាំក្សាន្តយកទៅរក្សាទុក៕ ហេង សូរិយា
