ម៉ូតូរ៉ឺម៉កប្រើប្រាស់ល្បឿនលឿន ដល់រង្វង់មូលផ្លូវបំបែកជា៤សួនពោធិ៍ព្រឹក្សបុកថយន្តកាមរីឆ្លាមខូចខាត

ខេត្តស្វាយរៀង៖ មានការភ្ញាក់ផ្អើលដល់អ្នកភូមិ ក៏ដូចជាអ្នកធ្វើដំណើរឆ្លងកាត់ ខណៈរថយន្តកាមរីឆ្លាមបានបុកជាមួយម៉ូតូរ៉ឺម៉ក ដែលប្រើប្រាស់ល្បឿនលឿន ខ្វះការប្រុងប្រយ័ត្នបើកបញ្ច្រាសគ្នាពេញទំហឹងនៅចំណុចរង្វង់មូលផ្លូវបំបែកជា៤ សួនពោធិ៍ព្រឹក្សកាលពីវេលាម៉ោង៤រសៀល ថ្ងៃទី៥ ខែកញា ឆ្នាំ២០១៧ លើផ្លូវលេខ ២០៨ ស្ថិតក្នុងភូមិ រោងបន្លែ សង្កាត់ ស្វាយរៀង ក្រុងស្វាយរៀង តែមិនមានរងរបួសដល់មនុស្សទេ។

សមត្ថកិច្ចថា អ្នកបើកបរម៉ូតូប្រើប្រាស់ល្បឿនលឿន ខ្វះការប្រុងប្រយ័ត្នមានឈ្មោះ ចិន សែន ភេទ ប្រុស អាយុ ៣១ ឆ្នាំ មុខរបរ រត់រឹម៉ករស់នៅភូមិ ទទា សង្កាត់ចេក ក្រុងស្វាយរៀង ខេត្ត ស្វាយរៀងដោយជិះម៉ូតូរ៉ឺម៉កម៉ាក ViVa ពណ៌ ខ្មៅ ពាក់ស្លាកលេខ ភ្នំពេញ 1Q3294 ខូចខាតយ៉ាងដំណំ។

ចំណែកអ្នកបើករថយន្តមានឈ្មោះ ម៉ែន សុវណ្ណ ភេទ ប្រុស អាយុ​ ៤២ឆ្នាំ រស់នៅភូមិ អញ្ចាញ ឃំុពោធិរាជ ស្រុក ស្វាយជ្រំ ខេត្ត ស្វាយរៀង ចំពោះរថយន្ត ខូចខាតស្រាល។

តាមសាក្សីបានឲ្យដឹងថាមុនកើតហេតុគេឃើញបុរសម្នាក់បានបើកម៉ូតូរឹម៉កមួយគ្រឿងម៉ាក ViVa ពណ៌ ខ្មៅ ដោយធ្វើដំណើរ ពីលិចទៅកើត ខណៈប្រើប្រាស់ល្បឿនលឿន ខ្វះការប្រុងប្រយ័ត្នលុះមកដលផ្លូវបំបែកជា៤សួនពោធិ៍ព្រឹក្សសង្ស័យចាប់ហ្វ្រាំងមិនទាន់ ក៏បុកនឹងរថយន្តម៉ាក កាមរី ពណ៌ទឹកប្រាក់ ស្លាកលេខភ្នំពេញ 2AB.4913យ៉ាងពេញទំហឹង បង្កឲ្យមានការភ្ញាក់ផ្អើលភ្លាមៗតែម្ដង។

ក្រោយកើតហេតុ ប្រជាពលរដ្ឋបានរាយការណ៍មកសមត្ថកិច្ចមូលដ្ឋានមកវាស់វែង ព្រមទាំងយកវត្ថុតាងទាំង២គ្រឿងមកកាន់អធិការដ្ឋាននគរបាលក្រុងស្វាយរៀងដោះស្រាយតាមច្បាប់ ៕ យឹម សុថាន