ហ៊ីយ៉ាន់ដាយបុកជាមួយគោយន្តកន្ត្រៃស្លាប់៣នាក់របួសធ្ងន់ស្រាល១០នាក់

ខេត្តកំពង់ឆ្នាំង៖ មនុស្សស្រីប្រុសក្មេងចាស់ចំនួន១៣នាក់ បានប៉ើងខ្ទាតចេញពីគោយន្តកន្រ្តៃបណ្តាលឲ្យស្លាប់និងរបួសរដូករណែលតតាមផ្លូវជាតិ នៅក្នុងឧប្បតិ្តហេតុគ្រោះថ្នាក់ចរាចរន៍មួយ ដែលបង្កឡើងរវាងរថយន្តបុកជាមួយ គោយន្តកន្រ្តៃក្នុងទិសដៅស្របគ្នា ។

ហេតុការណ៍គួរឲ្យរន្ធត់នេះ បានកើតឡើងកាលពីវេលាម៉ោង៥ជិតភ្លឺ ថ្ងៃទី៩ ខែកញ្ញា ឆ្នាំ២០១៧ ស្ថិតនៅក្នុងភូមិអូរតានេស ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។

ប្រធានការិយាល័យចរាចរណ៍ខេត្តកំពង់ឆ្នាំង លោក ឈឹម សារុន បានឲ្យដឹងថា នៅវេលាកើតហេតុ ចន្លោះគីឡូម៉ែត្រលេខ 74-75 មានរថយន្តមួយគ្រឿងម៉ាក HYUNDAI ពណ៌ស ពាក់ផ្លាកលេខ បាត់ដំបង ៣A-២៧២៤ ធ្វើដំណើរពីជើងទៅត្បូងក្នុងល្បឿនយ៉ាងលឿន នៅពេលមកដល់កន្លែងកើតហេតុ ក៍បានបុកគោយន្តកន្រ្តៃមួយគ្រឿងដែលប្រជាពលរដ្ឋជិះទៅបោចរពាក់ នៅពីមុខបណ្តាលឲ្យមនុស្សដែលជិះនៅលើគោយន្តចំនួន១៣នាក់ ប៉ើងខ្ទាតចេញពីគោយន្តរដូករណែល ស្លាប់ចំនួន២នាក់ភ្លាមៗតែម្តង និង ១១នាក់ទៀតបានរងរបួសធ្ងន់ ដឹកមកសង្រ្គោះនៅមន្ទីរពេទ្យបង្អែកខេត្ត ក្នុងចំណោមអ្នករបួសទាំង១១នាក់ បានស្លាប់ម្នាក់នៅពេលបញ្ជូនដល់មន្ទីរពេទ្យ ។

រហូតមដល់ពេលនេះ សមត្ថកិច្ចនៅមិនទាន់អាចបញ្ជាក់អំពីអត្តសញ្ញារបស់ជនរងគ្រោះបាននៅឡើយទេ គ្រាន់តែបញ្ជាក់ថា អ្នករងគ្រោះដល់ស្លាប់ គឺជាប្រជាពលរដ្ឋរស់នៅក្នុងភូមិបំពង់ផ្ចឹក ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង ។

នៅពេលនេះសមត្ថិច្ចអូសយកមធ្យោបាយបង្កយកមករក្សាទុកនៅការិយាល័យចរាចរណ៍ផ្លូវគោកខេត្តដើម្បីរង់ចាំដោះស្រាយទៅតាមនីតិវិធី ៕ ចន្ថា