ម៉ូតូហុងដាស្គូពីបុករ៉ឺម៉កអេតចាយពេលបត់ចូលឃ្លាំងមិនមានភ្លើងស៊ីញ៉ូម្ចាស់និងម្ចាស់ជជែកគ្នាតឹងសរសៃក

ភ្នំពេញ: មានឧប្បត្តិហេតុគ្រោះថ្នាក់ចរាចរណ៍មួយបានកើតឡើង រវាងរ៉ឺម៉កដឹកអេតចាយមួយគ្រឿង បត់ដោយមិនមានភ្លើងស៊ីញ៉ូនិងមិនប្រយ័ត្ន ត្រូវម៉ូតូហុងដាស្គូពីមួយគ្រឿងទៀតមកពីក្រោយ បុកពេញទំហឹង បណ្តាលឲ្យរងការខូចខាតយ៉ាងដំណំ កាលពីវេលាម៉ោង៩យប់ ថ្ងៃទី១១ ខែកញ្ញា ឆ្នាំ២០១៧ ស្ថិតនៅតាមបណ្ដោយផ្លូវបេតុង ក្នុងសង្កាត់ភ្នំពេញថ្មី ខណ្ឌសែនសុខ តែសំណាងល្អគ្មាននរណាម្នាក់រងរបួសក្នុងឧប្បត្តិហេតុនេះទេ ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរ៉ឺម៉កដឹកអេតចាយមួយគ្រឿង បើកបរតាមផ្លូវបេតុងក្នុងទិសដៅពីកើតទៅលិច។ លុះបើកដល់ចំណុចកើតហេតុ ក៏បានបត់ឆ្វេងដោយគ្មានផ្តល់ភ្លើងស៊ីញ៉ូឬលើកដៃជាសញ្ញាឡើយ ហើយភ្លាមនោះ ត្រូវបានម៉ូតូម៉ាកម៉ាកហុងដាស្គូពី ពណ៌ខៀវលាយសមួយគ្រឿង ពាក់ស្លាកលេខ ភ្នំពេញ FA-4946 មកពីក្រោយស្របទិសគ្នាចាប់ហ្វ្រាំងមិនទាន់ក៏បុកពេញទំហឹងបណ្តាល ខូចខាតអស់មួយកំណាត់មុខ តែមិនបណ្ដាលឲ្យភាគីទាំងសងខាង រងរបួសអ្វីន៉ទេ។

ប្រភពព័ត៌មានដដែលបានឲ្យដឹងទៀតថា ពេលកើតហេតុភា្លមភាគីខាងរ៉ឺម៉កដឹកអេតចាយមិននៅដោះស្រាយគ្នាតាមសម្រួលទេបែរជាជិះបត់ចូលក្នុងឃ្លាំងធ្វើព្រងើយធ្វើឲ្យភាគីម៉ូតូខឹង ជជែកគ្នាតឹងសរសៃក ផ្អើលដល់សមត្ថកិច្ចចុះមកដល់កន្លែងកើតហេតុទើបសម្រេច យករ៉ឺម៉កដឹកអេតចាយនិងម៉ូតូយកទៅរក្សាទុកនៅប៉ុស្តិ៍នគរបាលរដ្ឋបាលភ្នំពេញថ្មី ដើម្បីដោះស្រាយគ្នានៅពេលក្រោយ ៕ ប្រាថ្នា