រថយន្តក្រឡុកស៊ីម៉ង់ត៍ បើកបុករថយន្តអូសបុកបន្តកន្ទុយគ្នាខូចខាត៤គ្រឿង

ភ្នំពេញ ៖ រថយន្តចំនួន៤គ្រឿង ដោយមានរថយន្តស៊េរីទំនើបផងនោះបានរងការខូចខាតយ៉ាងដំណំ ខណៈពេលដែរត្រូវបានរថយន្តក្រឡុកស៊ីម៉ង់ត៍បើកបុកពីក្រោយហើយរុញទៅបុកបន្តកន្ទុយគ្នាយ៉ាងពេញទំហឹង ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង១១ព្រឹក ថ្ងៃទី១៦ ខែកញ្ញា ឆ្នាំ២០១៧ នៅតាមបណ្ដោយផ្លូវ៣០ម៉ែត្រ ស្ថិតក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

អ្នកបើករថយន្តបង្កនិងរថយន្តរងគ្រោះទាំងអស់៥គ្រឿងខាងលើ មិនបានស្គាល់អត្តសញ្ញាណនោះទេ ។

តាមប្រភពព័ត៌មានពីប្រជាពលរដ្ឋ ដែលឃើញហេតុការណ៍ខាងលើនេះ បានឲ្យដឹងថា នៅមុនដំបូងនៃកើតហេតុនេះ គឺគេឃើញរថយន្ត៤គ្រឿង ទី១ម៉ាក ហាយឡែនឌ័រ ពណ៌ស ពាក់ស្លាកលេខភ្នំពេញ 2AM-9973 ទី២រថយន្តម៉ាកកូរ៉េ ទំងន់១តោនកន្លះ ពណ៌ស ពាក់ស្លាកលេខ បាត់ដំបង 2A-6529 ទី៣រថយន្តម៉ាកCRV ពណ៌ខ្មៅ ពាក់ស្លាកលេខភ្នំពេញ 2S-0966 និងទី៤ រថយន្តស៊េរីទំនើបម៉ាក អូឌី ពណ៌ខ្មៅ ពាក់ស្លាកលេខភ្នំពេញ2AN-0808 បានធ្វើដំណើតាមបណ្ដោយផ្លូវ៣០ម៉ែត្រ ទិសដៅពីជើងទៅត្បូង ហើយស្របទិសគ្នាទាំង៤គ្រឿង ខណៈមកដល់ចំណុចកើតហេតុ រថយន្តទាំង៤គ្រឿងក៏បានបន្ថយល្បឿនបើកយុឺតៗ ព្រោះស្ថានភាពផ្លូវវាតូច ភ្លាមៗនោះក៏ស្រាប់តែមានរថយន្តក្រឡុកស៊ីម៉ង់ត៍មួយគ្រឿង ដែលបានផ្ទុកស៊ីម៉ង់ត៍ដែលលាយហើយពេលរថយន្តតែម្ដង និងបានធ្វើដំណើមកពីក្រោយគេ ក្នុងល្បឿនយ៉ាងលឿន ដោយចាប់ហ្វាំងមិនទាន់ បានជ្រុលមកបុករថយន្តស៊េរីទំនើបម៉ាកអូឌីពីក្រោយយ៉ាងពេញទំហឹង ទើបបង្កឲ្យមានរថយន្តចំនួន៤គ្រឿងខាងលើបុកបន្តកន្ទុយគ្នារងការខូចខាតតែម្ដង ។

ក្រោយពេលកើតហេតុ តៃកុងរថយន្តក្រឡុកស៊ីម៉ង់ត៍បានចុះគេចខ្លួនបាត់ពីកន្លែងកើតហេតុ ។ បន្ទាប់មកក៏មានដំណាងរថយន្តបង្កមកធ្វើការសម្រួលគ្នាជាមួយនិងរថយន្តរងគ្រោះទាំង៤គ្រឿងដែរ តែចរាចរណ៍គ្នាអស់រយះពេលយ៉ាងយូ នៅតែមិនត្រូវគ្នា ទើបកម្លាំងសមត្ថកិច្ចជំនាញចរាចរណ៍ខណ្ឌមានជ័យ ធ្វើការវាស់វែងយករថយន្តទាំង៥គ្រឿង ទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រងចាំដោយស្រាយក្រោយ៕ ភារ៉ា ដង្កោ