សារព័ត៌មាន នគរវត្ត តែងតែនាំមុខគេជានិច្ច
គេរាយការណ៍ថា សកម្មភាពកាប់បំផ្លាញ និងដឹកជញ្ជូនឈើកំពុងកើតមានយ៉ាងសកម្មនៅក្នុងដែនជម្រកសត្វស្រែពក ខេត្តមណ្ឌលគិរី។ អាជ្ញាធរពាក់ព័ន្ធរួមទាំងនាយកដែនជម្រកសត្វស្រែពកត្រូវគេអះអាងថា កំពុងសោយសុខយ៉ាងសប្បាយរីករាយ។ ប្រភពបានបន្ថែមថា ឈ្មួញខ្មែរ និងវៀតណាមបាននិងកំពុងធ្វើសកម្មភាពយ៉ាងគគ្រឹកគគ្រេងក្នុងការដឹកជញ្ជូនឈើចេញពីតំបន់ជម្រកសត្វស្រែពក។
ប្រភពពីសមត្ថកិច្ចប្រចាំតំបន់នោះបានឲ្យដឹងថា ចាប់ពីពិធីបុណ្យភ្ជុំបិណ្ឌកន្លងមកនេះ សកម្មភាពកាប់និងដឹកជញ្ជូនឈើបានកើតឡើងយ៉ាងសកម្ម មានទាំងក្រុមហ៊ុនស្របច្បាប់ និងការលួចកាប់អនាធិបតេយ្យ។ គេឃើញមានមន្ត្រីដែនជម្រកសត្វស្រែពកបានចុះពិនិត្យដល់ទីកន្លែងនៃការកាប់បំផ្លាញព្រៃឈើនោះដែរ ប៉ុន្តែហាក់មិនមានប្រតិកម្មអ្វីជាដុំកំភួននោះឡើយ។ ប្រភពបានបន្ថែមថា សកម្មភាពកាប់បំផ្លាញព្រៃឈើដែលកក្រើកឡើងនោះ ហាក់ដូចជាមានការបើកដៃពីអាជ្ញាធរមានសមត្ថកិច្ច ពិសេសមេដឹកនាំដែនជម្រកសត្វស្រែពកនោះតែម្តង។ ករណីនេះ ត្រូវគេពិព័រណ៌នាថា មានទំហំនិងទ្រង់ទ្រាយប្រហាក់ប្រហែលនឹងបទល្មើសនៅតំបន់អូរហ៊ុច ក្នុងខេត្តមណ្ឌលគិរីកាលពីលើកមុននោះដែរ។
បើតាមប្រភពពីមន្ត្រីមានសមត្ថកិច្ចខេត្តមណ្ឌលគិរីអះអាងថា សកម្មភាពនៃការកាប់បំផ្លាញ និងដឹកជញ្ជូនឈើនៅតំបន់ដែនជម្រកសត្វស្រែពក វាជាប្រព័ន្ធដែលថ្នាក់ដឹកនាំខេត្ត និងស្ថាប័នជំនាញជាអ្នកបិទភ្នែក។ រីឯអ្នកដែលទទួលបានប្រយោជន៍ច្រើនជាងគេគឺនាយកដែនជម្រកសត្វស្រែពក ដែលស្ថិតនៅក្រោមឱវាទរបស់មន្ទីរបរិស្ថានខេត្តមណ្ឌលគិរីនោះតែម្តង៕
