សារព័ត៌មាន នគរវត្ត តែងតែនាំមុខគេជានិច្ច
មួយរយៈពេលកន្លងមកនេះ សកម្មភាពនៃការប្រឡងជ្រើសរើសក្របខ័ណ្ឌនគរបាលជាតិត្រូវបានប្រព្រឹត្តទៅនៅតាមបណ្តាខេត្ត ដោយក្នុងនោះស្នងការនគរបាលខេត្តជាអ្នករៀបចំការប្រឡងផ្ទាល់។ បេក្ខជនជាច្រើននៅតាមបណ្តាខេត្តសុទ្ទតែអះអាងស្រដៀងគ្នាថា ពួកគេបានចំណាយប្រាក់យ៉ាងហោចណាស់៥ពាន់ដុល្លារសម្រាប់ការប្រឡង។ ទឹកប្រាក់៥ពាន់ដុល្លារមិនប្រាកដថា នឹងជាប់នោះផងទេ។
យុវជនម្នាក់នៅខេត្តត្បូងឃ្មុំនិយាយថា ខ្លួនបានចំណាយទឹកប្រាក់៥ពាន់ដុល្លារឲ្យទៅមន្ត្រីនគរបាលម្នាក់។ គេថា បើមិនជាប់ទេប្រគល់ប្រាក់ឲ្យវិញ។ រីឯអ្នកផ្សេងទៀតដែលហ៊ានចំណាយប្រាក់រហូតដល់៧ពាន់ដុល្លារអះអាងថា ខ្លួនមានសង្ឃឹមច្រើន។ ការចំណាយប្រាក់ហាក់ដូចជាមានការលាក់លៀម និងស្ងាត់កំបាំង។ គេនិយាយថា បញ្ហានៃការប្រឡងដែលរៀបចំនៅតាមខេត្តមានលាយឡំដោយអំពើពុករលួយច្រើន។ បេក្ខជនប្រឡងភាគច្រើនចំណាយប្រាក់ឲ្យទៅខ្សែបណ្តោយនៃមន្ត្រីនគរបាល។
ការប្រឡងជ្រើសរើសក្របខ័ណ្ឌនគរបាលជាតិកាលពីឆ្នាំមុនរៀបចំដោយក្រសួងមហាផ្ទៃធ្វើឲ្យមានបញ្ហាចម្រូងចម្រាសជាច្រើន។ សម្រាប់ពេលនេះគឺក្រសួងមហាផ្ទៃផ្តល់សិទ្ធិឲ្យស្នងការដ្ឋាននគរបាលខេត្តរៀបចំការប្រឡងជ្រើសរើស។ ហេតុដូច្នេះហើយបានជាមានលេចឮថាមានអំពើពុករលួយនៅក្នុងការប្រឡង ហើយមិនមែនមានតែនៅខេត្តត្បូងឃ្មុំនោះទេ នៅខេត្តផ្សេងទៀតក៏មានលេចឮដូចគ្នានេះដែរ៕
