សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរស២នាក់ត្រូវប៉ូលិសចាប់ឃាត់ខ្លួនសង្ស័យ ជាមុខសញ្ញាចោរលួចកាច់សោកម៉ូតូ យ៉ាងសកម្មកក្នុងរាជធានីភ្នំពេញ និងប្រើប្រាស់គ្រឿងញៀន ក្រោយពីពួកគេជិះម៉ូតូអត់មានស្លាកលេខមួយគ្រឿងឌុបគ្នា។
ករណីឃាត់ខ្លួនកាលពីម៉ោង១១និង៣០នាទីព្រឹក ថ្ងៃទី៣០ ខែកញ្ញា ឆ្នាំ២០១៧ នៅផ្លូវសហព័ន្ធរុស្សីភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ជនសង្ស័យទី១ឈ្មោះ អ៊ុក ច័ន្ទប៊ុនណារ៉ាក អាយុ២៩ឆ្នាំ មុខរបរមិនពិតប្រាកដ ស្នាក់នៅផ្ទះជួលនៅសង្កាត់ទួលទំពូង ខណ្ឌចំការមន មានស្រុកកំណើត នៅសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ជនសង្ស័យទី២ ឈ្មោះ នៅ ស៊ីនិត អាយុ២៦ឆ្នាំ មុខរបរមិនពិតប្រាកដ ស្នាក់នៅភូមិស្ទឹងជ្រៅ សង្កាត់ដើមមៀន ក្រុងតាខ្មៅ ខេត្តកណ្តាល។
សមត្ថកិច្ចបានប្រាប់ថា មុនឃាត់ខ្លួនជនសង្ស័យខាងលើ ខណៈកម្លាំងបុស្តិ៍នគរបាលរដ្ឋបាលទឹកថ្លាល្បាតក្នុងមូលដ្ឋានស្រាប់តែប្រទះជនសង្ស័យខាងលើជិះម៉ូតូមួយគ្រឿងម៉ាកSR MOTARD ពណ៌ស លាយខ្មៅ អត់មានស្លាកលេខ ដោយឌុបគ្នាតាមផ្លូវសហព័ន្ធរុស្សីក្បែរស្ពានអាកាសថ្មីដោយសង្ស័យ ក៏ហៅឲ្យឈប់និងត្រួតពិនិត្យឃើញម៉ូតូអត់លេខខាងលើបែកគ្រាប់កុងតាក់ខ្ទេចនិងនៅជាប់ខ្លួនឃើញមានដែកឆ្នៃចុងស្រួចសម្រាក់កាច់ម៉ូតូចំនួនមួយត្រូវជនសង្ស័យលាក់ទុកក្នុងកញ្ចប់បារីឃើញដូចនេះក៍ឃាត់ខ្លួនតែម្តង។
សមត្ថកិច្ចបានប្រាប់ទៀតថាក្រោយពីនាំខ្លួនមកដល់ប៉ុស្តិ៍នគរបាលរដ្ឋបាលទឹកថ្លាជាបឋមបានធ្វើតេស្តរកសារធាតុញៀនតាមរយៈទឹកនោម ។ ក្រោយពីធ្វើតេសរួចឃើញថា ជនសង្ស័យទាំង២នាក់មានផ្ទុកនូវសារធាតុញៀន ដូច្នេះត្រូវបានឃាត់ខ្លួនបណ្តោះអាសន្ន និងសាកសួរបន្តហើយត្រូវបានជនសង្ស័យសារភាពប្រាប់ថា ពួកគេទាំង២នាក់ជាមុខសញ្ញាប្រើប្រាស់គ្រឿងញៀន និងកាច់កម៉ូតូយ៉ាងសកម្មកក្នុងរាជធានីភ្នំពេញពិតប្រាកដមែនហើយម៉ូតូដែលជិះនេះ ក៏លួចគេមកពីក្រុងតាខ្មៅខេត្តកណ្តាលមកដែល។
បច្ចុប្បន្នជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខរង់ចាំបញ្ជូនទៅសាលាដំបូងរាជធាននីភ្នំពេញពេលក្រោយ៕ តុង សីហា
