មនុស្ស៣នាក់រងរបួសធ្ងន់ ស្រាល ក្នុងហេតុការណ៍គ្រោះថ្នាក់ចរាចរណ៍នៅខេត្តស្វាយរៀង

ខេត្តស្វាយរៀង៖ យ៉ាងហោចណាស់ក្មេងប្រុសម្នាក់ និងបុរស២នាក់ បានរងរបួសធ្ងន់ ស្រាលដោយករណីគ្រោះថ្នាក់ចរាចរណ៍ខណៈជិះម៉ូតូបត់ឆ្វេង ខ្វះការប្រុងប្រយ័ត្ន ក៏បុកជាមួយម៉ូតូសណ្ដោងរ៉ឺម៉កពេញទំហឹងបណ្ដាលឲ្យខ្ទាតទៅបុកបង្គោលភ្លើងបំភ្លឺផ្លូវកាលពីវេលាម៉ោង៥រសៀល ថ្ងៃទី៣០ ខែកញ្ញា ឆ្នាំ២០១៧ លើផ្លូវជាតិលេខ១ ស្ថិតក្នុងភូមិ បាក់រនាស់ សង្កាត់ សង្ឃ័រ ក្រុង ស្វាយរៀង ខេត្តស្វាយរៀង។

យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថា មុនកើតហេតុ មានម៉ូតូម៉ាក សេ១២៥ ពណ៌ ខ្មៅ ពាក់ស្លាកលេខ ស្វាយរៀង ១D ៩៤០៦ បើកបរដោយឈ្មោះ ជិន ថាវី ភេទ ប្រុស អាយុ ៤៨ មុខរបរ កសិករ រស់នៅភូមិ បុសផ្លាង ឃុំ បុសមន ស្រុក រំដួល ខេត្ត ស្វាយរៀងដោយធ្វើដំណើរ ពីលិចទៅកើត លើកំណាត់ផ្លួវជាតិលេខ១ ហើយដល់ផ្លូវបំបែក ក៏បត់ឆ្វេងខ្វះការប្រុងប្រយ័ត្ន ស្រាប់តែមានម៉ូតូសណ្ដោងរ៉ឺម៉កម៉ាក សេ ១២៥ ពណ៌ខ្មៅ ពាក់ស្លាកលេខ ភ្នំពេញ ១A ២៥៧៩ បើកបរដោយឈ្មោះ នាយ អេត ភេទ ប្រុស អាយុ ៣៧ ឆ្នាំ មុខរបរ ជាងដែក និងអ្នករួមដំណើរឈ្មោះ ភុន រ៉ាវី ភេទ ប្រុស អាយុ ១០ ឆ្នាំ មុខរបរ សិស្ស រស់នៅភូមិស្វាយជ្រំ ឃុំ ស្វាយជ្រំ ស្រុក ស្វាយជ្រំ ដែល បើកពីកើតទៅលិចបញ្រាស់គ្នា ក៏បុកពេញទំហឹងលាន់សូរដូចរន្ទះបង្កឲ្យមានការភ្ញាក់ផ្អើលតែម្ដង។

ក្រោយកើតហេតុសមត្ថកិច្ចបានមកដល់វាស់វែង និងយកជនរងគ្រោះទៅកាន់មន្ទីរពេទ្យ និងអូសមធ្យោបាយទាំង២គ្រឿងរក្សាទុកនៅអធិកាដ្ឋាននគរបាលក្រុងស្វាយរៀងចាត់ការតាមច្បាប់៕ យឹម សុថាន