ឃាត់ខ្លួនសន្តិសុខយាមបុរីពិភពថ្មី៦នាក់សង្ស័យប៉ងធ្វើឃាតស្ត្រីពាណិជ្ជករម្នាក់ប្លន់ទ្រព្យសម្បត្តិមិនសម្រេច

ភ្នំពេញ ៖ នគរបាលខណ្ឌសែនសុខបានឃាត់ខ្លួនបុរស៦នាក់ ជាកងសន្តិសុខយាមក្នុងបុរីពិភពថ្មី ដែលជាប់ពាក់ព័ន្ឋសង្ស័យថាបានព្រួត គ្នាវាយស្រ្តីម្នាក់ឲ្យរងរបួសធ្ងន់ ប៉ុនប៉ងសម្លាប់ប្លន់យកទ្រព្យសម្បត្តិ ខណៈដែលនាងកំពុងដេកលក់នៅក្នុងផ្ទះ។

ហេតុការណ៍នេះភ្ញាក់ផ្អើលឡើងកាលពីព្រឹកថ្ងៃទី១ ខែតុលា ឆ្នាំ ២០១៧ នៅផ្ទះលេខ៣១ ក្រុម១២ ផ្លូវលេខ៦បេតេ ភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ។

ប៉ូលិសនិយាយថា ក្រុមជនជាប់សង្ស័យទាំង៦នាក់ ខាងលើ ១,ឈ្មោះ រ៉ា វិសាល អាយុ១៨ឆ្នាំ ។ ២,ឈ្មោះ សាបាន ភក្ត្រា អាយុ២៤ឆ្នាំ ៣,ឈ្មោះ តឿ អាយុ២០ឆ្នាំ។ ពួកគេមានមុខរបរជាបុគ្គលិកសន្តិសុខ ។ ៤,ឈ្មោះ ប្រាក់ វាន្នី អាយុ៣៦ឆ្នាំ។ ៥,ឈ្មោះ រស់ វ៉ាន អាយុ២១ឆ្នាំ ។ ៦,ឈ្មោះ ធី ថាន អាយុ៣១ឆ្នាំ ។

ប៉ូលិសនិយាយថា ជនសង្ស័យខាងលើ ត្រូវបានឃាត់ខ្លួនដោយជាប់សង្ស័យថា មានការពាក់ព័ន្ឋប៉ុនប៉ងធ្វើឃាតមកស្រ្តីពាណិជ្ជករម្នាក់ មានទីលំនៅក្នុងបុរីពិភពថ្មី ដែលនាងជាជនរងគ្រោះនៅក្នុងហេតុការណ៍នេះ ឈ្មោះ គឹម សុផុនវឌ្ឍនា អាយុ៣៦ឆ្នាំ មុខរបរជាពាណិជ្ជករ ស្នាក់នៅផ្ទះខាងលើ ក្នុងបុរីពិភពថ្មី ជាមួយប្តី និងកូន២នាក់ អាយុក្រោម៨ឆ្នាំ។

លោក ត្រាង ទី អាយុ៤៨ឆ្នាំ ត្រូវជាប្តីរបស់ជនរងគ្រោះបានឲ្យដឹងថា÷ ប្រពន្ឋរបស់គាត់មិនដែលមានទំនាស់ ជាមួយអ្នកណាឡើយ ហើយមុនពេលកើហេតុ កាលពីវេលាម៉ោង៤ព្រឹក ថ្ងៃអាទិត្យទី០១ ខែតុលា គាត់បានភ្ញាក់ពីដំណេក ត្រូវធ្វើដំណើរទៅខេត្តសៀមរាប ដើម្បីទំនាក់ទំនងការងារ ដោយឲ្យជំនួយការបើករថយន្តមកទទួល ជិះចេញពីផ្ទះទៅ ដោយមិនបានចាក់សោទ្វារបន្ទប់ គ្រាន់តែដាក់គន្លឹះទ្វាររបងមុខ ហើយក៏ជិះរថយន្តចាកចេញទៅ លុះដល់វេលាម៉ោង៤និង៣០នាទី ស្រាប់តែកូនស្រីទូរស័ព្ទប្រាប់ថា÷ ម្តាយមានឈាមប្រឡាក់ពេញមុខ ពេញខ្លួនលើពូក ទើបវិលត្រឡប់មកផ្ទះវិញផ្អើលឆោឡោ បន្ទាប់ពីបានឃើញប្រពន្ធ ស្ថិតក្នុងស្ថានភាពរបួសធ្ងន់ធ្ងរ ក៏ប្រញាប់ប្រញាល់ដឹកបញ្ជូនទៅគ្លីនិកតាមរថយន្តរបស់ខ្លួន រួចទើបរាយការណ៍មកប្រាប់សមត្ថកិច្ចចុះទៅពិនិត្យមើលជាក់ស្តែង។

ក្រោយកើតហេតុ សមត្ថកិច្ចនគរបាលជំនាញព្រហ្មទណ្ឌរបស់ខណ្ឌ និងក្រុងបានចុះទៅពិនិត្យ កោសល្យវិច័យ រកឃើញសម្ភារៈបន្សល់ទុក នៅកន្លែងលើតហេតុ នោះមាន ពិលពាក់ក្បាលសន្តិសុខពិភពថ្មី១ ខ្សែក្រវាត់របស់សន្តិសុខបុរី ពិភពថ្មី១ ខាងក្បាលប្រឡាក់សុទ្ធតែឈាម មួកសន្តិសុខ១ ស្បែកជើង ផ្ទាត់មួយចំហៀង ហើយក្រោយពីពិនិត្យកោសល្យវិច័យរួច សមត្ថកិច្ចឈានទៅ ឃាត់ខ្លួនក្រុមសន្តិសុខបុរីពិភពថ្មី៦នាក់ យកទៅសាកសួរនៅអធិការដ្ឋានខណ្ឌសែនសុខ ហើយក្នុងចំណោមមនុស្ស៦នាក់ មាន២នាក់ ធ្វើតេស្តទឹកនោម ឃើញផ្ទុកសារធាតុញៀន សមត្ថកិច្ចបន្តស្រាវជ្រាវបន្តទៀត។

លោក ម៉ក ហុង អធិការនគរបាលខណ្ឌសែនសុខ បានមានប្រសាសន៍ ការឃាត់ខ្លួនក្រុមជនសង្ស័យទាំង៦នាក់ខាងលើនេះ អាចមានការជាប់ពាក់ព័ន្ឋជាជនដៃដល់តែម្នាក់ ឬ២នាក់ប៉ុណ្ណោះ ហើយលោកកំពុងតែបន្តស្រាវជ្រាវនៅឡើយ៕ តុង សីហា