សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោក ឃួង ស្រេង បានចូលរួមជាអធិបតីប្រកាសតែងតាំងអភិបាលខណ្ឌសែនសុខ និងតំណែងជាអភិបាលរងខណ្ឌចំនួន ៦ខណ្ឌ សែនសុខ , ចំការមន,ដូនពេញ ,ឬស្សីកែវ, ព្រែកព្នៅ និងជ្រោយចង្វារ និងផ្ទេរភារកិច្ច ជានាយករដ្ឋបាល ខណ្ឌ ចំណុះឲ្យសាលារាជធានីភ្នំពេញ បន្ទាប់ពីសម្ដេចតេជោ ហ៊ុន សែន ចេញអនុក្រឹត្យ និងសម្ដេចក្រឡាហោម ស ខេង ចេញសេចក្ដីសម្រេចតែងតាំងមន្ដ្រីរាជ ការទាំងនេះ។ ពិធីនេះ បានប្រព្រឹត្ដទៅនៅរសៀលថ្ងៃទី ០២ តុលា ឆ្នាំ២០១៧ នៅសាលារាជធានីភ្នំពេញ ។
នៅក្នុងពិធីតែងតាំង និងផ្ទេរភារកិច្ចមន្ដ្រីសាលារាជធានីភ្នំពេញមួយកញ្ចប់នាពេលរសៀលនេះ ក៏មានការអញ្ជើញចូលរួមពីថ្នាក់ដឹកនាំសាលារាជធានី អភិបាលខណ្ឌទាំង១២ និងមន្ដ្រីរាជការពាក់ព័ន្ធ មួយចំនួនទៀត។ ខាងក្រោមនេះជាអនុក្រឹត្យ និងសេចក្ដីប្រកាសតែងតាំង និងផ្ទេរភារកិច្ចមន្ដ្រីរាជការ ចំណុះឲ្យសាលារាជធានីភ្នំពេញ។
លោក ឃួង ស្រេង បានបញ្ជាក់ថា ៖ រដ្ឋបាល រាជធានីកំពុង បានអនុវត្ត និង កំពុងអភិវឌ្ឍន៍ លើហេដ្ឋារចនាសម្ព័ន្ធរូបវ័ន និង ការងារ ការពារសន្តិសុខ សាធារណៈជូនប្រជាពលរដ្ឋ ក្នុងនោះ ការអនុវត្ត គោលនយោបាយ ភូមិ សង្កាត់មានសុវត្ថិភាព ក្នុងរាជធានីភ្នំពេញ ។
លោក ឃួង ស្រេង បានបន្ដថា៖ រឿងផ្លាស់តំណែង មន្ដ្រី នៅតាមបណ្ដាអង្គភាព ស្ថាប័ននីិមួយៗ នេះ មិនមែន ចង់ចាញ់ចង់ឈ្នះអ្នកណាម្នាក់នោះទេ គឺចង់ឲ្យមន្ដ្រីទាំងអស់នោះ ចេះកែទម្រង់ការងារ នៅមូលដ្ឋានខ្លួនឲ្យមានប្រសិទ្ធភាពខ្ពស់ ។ ជាក់ស្ដែងថ្ងៃនេះ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នៅថ្ងៃទី២៩ ខែកញ្ញា ឆ្នាំ២០១៧ សម្ដេចបានចេញអនុក្រឹត្យតែងតាំងអភិបាលថ្មី ខណ្ឌសែនសុខ ដោយផ្ទេរភារកិច្ចលោក ប៉ិល កុសល ទៅបម្រើការងារនៅក្រសួងមហាផ្ទៃ ជំនួសដោយ លោក ម៉ូវ ម៉ានិត ដែលបច្ចុប្បន្ន ជានាយករដ្ឋបាលសាលាខេត្តពោធិ៍សាត់។
សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានចេញសេចក្តីសម្រេចផ្ទេរភារកិច្ចអភិបាលរងខណ្ឌចំនួន៥រូប ឲ្យទៅបម្រើការងារនៅសាលា រាជធានីភ្នំពេញ កាលពីថ្ងៃទី២៩ ខែកញ្ញា ឆ្នាំ២០១៧។ យោងតាមសេចក្តីសម្រេចដដែលនេះ បានបញ្ជាក់ឲ្យដឹងថា ទី១ លោក ធិ ងិ ឋានន្តរស័ក្តិវរមន្ត្រីថ្នាក់លេខ៤ ពីអភិបាលរងខណ្ឌជ្រោយចង្វា ឲ្យទៅបម្រើការងារនៅសាលារាជធានីភ្នំពេញ ។ ទី២ លោកស្រី សក់ ចិន្តារី ឋានន្តរស័ក្តិវរមន្ត្រី ថ្នាក់លេខ៣ ពីអភិបាលរងខណ្ឌ៧មករា ឲ្យទៅបម្រើការងារនៅសាលារាជធានីភ្នំពេញ ទី៣ លោក កូប ស្លេះ ឋានន្តរស័ក្តិនាយក្រមការ ថ្នាក់លេខ១ ពីអភិបាលរងខណ្ឌទួលគោក ឲ្យទៅបម្រើការងារនៅសាលារាជធានីភ្នំពេញ ទី៤ លោក អ៊ុក សាកល ឋានន្តរស័ក្តិវរមន្ត្រី ថ្នាក់លេខ១ ពីអភិបាលរងខណ្ឌដូនពេញ ឲ្យទៅបម្រើការងារនៅសាលារាជធានីភ្នំពេញ និងទី៥ លោកស្រី សុត ចណ្ណារា ឋានន្តរស័ក្តិនាយក្រមការ ថ្នាក់លេខ៣ ពីអភិបាលរងខណ្ឌទួលគោក ឲ្យទៅបម្រើការងារនៅសាលារាជធានីភ្នំពេញ។
សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ កាលពីថ្ងៃទី២៩ ខែកញ្ញា ឆ្នាំ២០១៧ បានចេញសេចក្តីសម្រេចផ្ទេរភារកិច្ច និងតែងតាំងមុខដំណែងជាអភិបាលរងខណ្ឌ នៃសាលារាជធានីភ្នំពេញចំនួន៨រូប។ នៅក្នុងសេចក្តីប្រកាសចុះថ្ងៃទី២៩ ខែកញ្ញា ឆ្នាំ២០១៧បាន សម្រេចភារកិច្ចលោកស្រី ទាវ ឆវីមនីរ៉ា ពីអភិបាលរងខណ្ឌចំការមន ឲ្យទៅជាអភិបាលរងខណ្ឌ៧មករា, ផ្ទេរភារកិច្ចលោកស្រី ព្រុំ រដ្ឋា ពីអភិបាលរងខណ្ឌសែនសុខ ឲ្យទៅជាអភិបាលរងខណ្ឌទួលគោក និងផ្ទេរភារកិច្ចលោកស្រី លី រ៉ូហ្សាមី ពីអភិបាលរងខណ្ឌឬស្សីកែវ ឲ្យទៅជាអភិបាលរងខណ្ឌសែនសុខ។
សម្តេចក្រឡាហោម ស ខេង ក៏បានសម្រេចតែងតាំងអភិបាលរងខណ្ឌចំនួន៥រូបផងដែររួមមាន៖ ទី១-តែងតាំងលោក កៅ សារ៉ាវុធ ជាអភិបាលរងខណ្ឌជ្រោយចង្វារ ទី២-តែងតាំងលោក ចាន់ គន្ថេត ជាអភិបាលរងខណ្ឌដូនពេញ ទី៣-តែងតាំងលោក ចាន់ បណ្ឌិត ជាអភិបាលរងខណ្ឌទួលគោក ទី៤-តែងតាំងលោកស្រី សួស សូលីដា ជាអភិបាលរងខណ្ឌឬស្សីកែវ និងទី៥- តែងតាំងលោកស្រី កែវ សាម៉ុល ជាអភិបាលរងខណ្ឌចំការមន។
សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ កាលពីថ្ងៃទី២៩ ខែកញ្ញា ឆ្នាំ២០១៧ បានចេញសេចក្តីប្រកាសតែងតាំងមុខដំណែង នាយករដ្ឋបាលថ្មីនៅសាលា ខណ្ឌជ្រោយចង្វារ សាលាខណ្ឌព្រែកព្នៅ និងសាលាខណ្ឌដូនពេញចំនួន៣រូប។ នៅក្នុងសេចក្តីប្រកាសតែងតាំងលោក សែម ដារិទ្ធ ជានាយករដ្ឋបាលសាលាខណ្ឌជ្រោយចង្វារ, តែងតាំងលោក ស៊ឹម សុផង់ ជានាយករដ្ឋបាលសាលាខណ្ឌព្រែកព្នៅ និងតែងតាំងលោក ចាប ឌីណា ជានាយករដ្ឋបាលសាលាខណ្ឌដូនពេញ៕ សំរិត
