សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ លោកផូង វណ្ណ ចៅក្រមស៊ើបសួរសាលាដំបូងខេត្តកណ្ដាល សម្រេចបិទការស៊ើបសួររឿងក្ដីបុរសជនជាតិចិនម្នាក់ដែលលួចដំឡើងប្រព័ន្ធអ៊ីនធឺណិតបម្រើឱ្យការចាប់ជំរិតនៅសណ្ឋាគារត្រានីកា ក្រុងតាខ្មៅ រួចបញ្ជូនទៅបើកសវនាការជំនុំជម្រះ ។ ការស៊ើបសួរនេះ ប្រើរយៈពេលជាងមួយខែប៉ុណ្ណោះ ។
ប្រភពព័ត៌មានបញ្ជាក់ថា បុរសជនជាតិឈ្មោះ ZHU CHULE អាយុ៣១ឆ្នាំ ត្រូវបានឃុំខ្លួនដាក់ពន្ធនាគារ កាលពីថ្ងៃទី៣១ ខែសីហា ឆ្នាំ២០១៧ ក្រោមការចោទប្រកាន់ពីបទ”បង្កើតប្រព័ន្ធបច្ចេកវិទ្យាគមនាគមន៍ និងព័ត៌មានដែលដំណើរការជាមួយបណ្តាញទូរគមនាគមន៍សម្រាប់ប្រើប្រាស់ក្នុងគោលបំណងគេចវេះពីការទូទាត់ប្រាក់និងកេងចំណេញលើបរិមាណនៃការផ្តល់សេវាទូរគមនាគមន៍ ប្រព្រឹត្តនៅចំណុចសណ្ឋាគារ ត្រានីកា ក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល កាលពីថ្ងៃទី២៨ ខែសីហា ឆ្នាំ២០១៧ តាមមាត្រា៨៥នៃច្បាប់ស្តីពីទូរគមនាគមន៍”។
បទល្មើសនេះ កំណត់ការផ្តន្ទាទោសដាក់ពន្ធនាគារពី១ឆ្នាំទៅ៥ឆ្នាំ និងពិន័យជាប្រាក់ពី២លានរៀលទៅ១០លានរៀល ។
ប្រភពព័ត៌មានបញ្ជាក់ថា កាលពីរសៀលថ្ងៃទី១០ ខែតុលា ឆ្នាំ២០១៧ សាលាដំបូងខេត្តកណ្ដាល បានលើកយកសំណុំរឿងនេះមកបើកសវនាការជំនុំជម្រះ ដោយមានលោក ហុក វ៉ាន់ធីណា ប្រធានសាលាដំបូងខេត្តកណ្ដាល ជាចៅក្រមជំនុំជម្រះ និង លោក ឯក ស៊ុនរស្មី ជាតំណាងអយ្យការ ។
ក្រោយបញ្ចប់ការសួរដេញដោល តុលាការលើកពេលប្រកាសសាលក្រមទៅថ្ងៃទី១៨ ខែតុលា ខាងមុខនេះវិញ ៕ចេស្តា
