សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលនាយកដ្ឋានប្រឆាំងការជួញដូរមនុស្ស និងអនីតិជន សហការជាមួយនគរបាលប៉ុស្តិ៍កាកាបបានឆ្មក់បង្ក្រាបទីតាំងម៉ាស្សាមួយកន្លែងនៅតាមបណ្ដោយផ្លូវលេខ២០០៤ ស្ថិតនៅក្នុងភូមិត្រពាំងល្វា១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង៨ និង៥នាទីយប់ ថ្ងៃទី១០ ខែតុលា ឆ្នាំ២០១៧ ឃាត់ខ្លួនមនុស្សប្រុសស្រីចំនួន៨នាក់ ។
សមត្ថកិច្ចបានឲ្យដឹងថា ការឃាត់ខ្លួនមនុស្សទាំង៨នាក់នោះ មាន២នាក់គឺជាម្ចាស់ទីតាំងហាងម៉ាស្សាកោសជប់ខាងលើ និងត្រូវបានគេស្គាល់ម្នាក់ឈ្មោះ អាត់ សល់ ភេទប្រុស អាយុ៣៦ឆ្នាំ និងម្នាក់ទៀតឈ្មោះ មោង គឹមលាង ភេទស្រី អាយុ៣៥ឆ្នាំ។
ដោយឡែកស្ត្រីចំនួន៦នាក់ទៀតគឺជាអ្នកបម្រើសេវាម៉ាស្សាកោសជប់ និងបម្រើផ្លូវភេទផងសុំមិនបញ្ចេញឈ្មោះ ហើយមានអាយុចាប់ពី១៨ឆ្នាំដល់៤០ឆ្នាំ ក្រៅពីនេះក៏មានការដកហូតសៀវភៅកត់ត្រាចំនួនភ្ញៀវ និងថ្ងៃធ្វើការរបស់ពួកនាងៗទាំងនោះមួយចំនួនថែមទៀតផងដែរ។
សមត្ថកិច្ចបានបន្តថា មុននឹងឃាត់ខ្លួនកម្លាំងនគរបាលនៃនាយកដ្ឋានការជួញដូរមនុស្ស និងអនីតិជន បានស្រាវជ្រាវយូរមកហើយបន្ទាប់ពីមានការសង្ស័យ ទៅលើទីតាំងមួយនេះថា មានការបើកហាងកោសជប់ និងម៉ាស្សា ប៉ុន្តែមានការបង្កប់នូវសេវាបម្រើផ្លូវភេទ និងសង្ស័យថាអាចមានការជួញដូរមនុស្សទៀតផង។
រហូតមកដល់វេលាកើតហេតុ ទើបកម្លាំងខាងលើដោយមានការសហការជាមួយកម្លាំងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ និងកម្លាំងនគរបាលប៉ុស្ដិ៍កាកាប នៃអធិការដ្ឋាននគរបាលខណ្ឌពោធិ៍សែនជ័យ ដឹកនាំដោយលោក កុល បុន ព្រះរាជអាជ្ញារងអមសាលាដំបូងរាជធានីភ្នំពេញ ក៏បានចុះបង្ក្រាបជាក់ស្ដែងទាំងយប់បែបនេះតែម្ដង និងចាប់ខ្លួនមនុស្សទាំង៨នាក់នោះនាំទៅកាន់នាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ ដើម្បីសួរនាំ និងចាត់ការតាមច្បាប់តែម្ដង៕ សុខាសែនជ័យ
