សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ពេលនេះ សាលាដំបូងរាជធានីភ្នំពេញ កំពុងចាត់ការបណ្តឹងអនិកជនខ្មែររស់នៅអាមេរិក ប្តឹងកញ្ញា នី មុន្នីនាថ តារាសម្ដែងល្បីល្បាញមួយរូប ទាមទារប្រាក់ចំនួន៧ម៉ឺនដុល្លារអាមេរិក និង សំណងជំងឺចិត្តចំនួន៥ម៉ឺនដុល្លារអាមេរិក ។
តួឯកប្រុសក្នុងរឿងក្ដីឈ្មោះ អ៊ឹង សូឡាង អាយុ៤២ឆ្នាំ រីឯតួឯកស្រី កញ្ញា នី មុន្នីនាថ អាយុទើប២៧ឆ្នាំប៉ុណ្ណោះ ដោយប្តឹងចោទប្រកាន់តួឯកស្រី ថាបានបោកប្រាស់យកប្រាក់ជាច្រើនម៉ឺនដុល្លារអាមេរិក ដោយសន្យាថា នឹងយកគ្នាជាប្តីប្រពន្ធ ។ ប៉ុន្តែ កន្លងមក ម្តាយកញ្ញា នី មុន្នីនាថ បដិសេធថា កូនស្រីពុំបានប្រព្រឹត្តដូចការចោទប្រកាន់ទេ ។
ពាក់ព័ន្ធបញ្ហានេះ ប្រភពព័ត៌មានពីមន្ត្រីសាលាដំបូងរាជធានីភ្នំពេញ បញ្ជាក់ថា តុលាការកំពុងចាត់លើបណ្តឹងនេះហើយ ខណៈដែលនៅថ្ងៃទី១៤ ខែតុលា នេះ ពុំទាន់អាចសុំការបញ្ជាក់បន្ថែមពីលោក យិច សមិទ្ធិ មេធាវីតំណាងដោយអាណត្តិរបស់ដើមចោទ អ៊ឹង សូឡាង បានទេ ។
ពាក្យបណ្ដឹងរដ្ឋប្បវេណីដាក់ចូលលោក តាំង ស៊ុនឡាយ ប្រធានសាលាដំបូងរាជធានីភ្នំពេញ កាលពីថ្ងៃទី២៨ ខែកញ្ញា ឆ្នាំ២០១៧ លោកមេធាវី យិច សមិទ្ធិ អះអាងថា ដើមចោទ អ៊ឹង សូឡាង និង ចុងចម្លើយ បានស្គាល់គ្នានិងស្រលាញ់គ្នានៅឆ្នាំ២០១៤ ដោយព្រមព្រៀងយ៉ាងច្បាស់លាស់ថា នឹងយកគ្នាជាប្តីប្រពន្ធនៅថ្ងៃអនាគត ហើយបានធ្វើពិធីភ្ជាប់ពាក្យ ត្រឹមត្រូវ ។ នៅថ្ងៃភ្ជាប់ពាក្យ ដើមចោទបានផ្តល់ជូនគ្រឿងអលង្ការជាច្រើន សរុបចំនួន៣៧០0០ដុល្លារអាមេរិក ។ ដើមចោទ តែងតែផ្តល់ប្រាក់ជាបន្តបន្ទាប់ទៀតអស់ជាច្រើនម៉ឺនដុល្លារអាមេរិក ។ ប៉ុន្តែក្រោយមក បែរជា កញ្ញា នី មុន្នីនាថ ផ្តាច់ពាក្យវិញ ដោយហេតុផល ដើមចោទមិនចេះប្រើពាក្យផ្អែមជាមួយចុងចម្លើយទៅវិញ ៕ ចេស្តា
