សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ បុរសម្នាក់បានរងរបួសធ្ងន់ក្នុងករណីគ្រោះថ្នាក់ចរាចរណ៍មួយកើតឡើងរវាងរថយន្តបែនបុកគ្នា ជាមួយរថយន្តដឹកកុងតឺន័រនៅវេលាម៉ោង១១និង២០នាទីយប់ ថ្ងៃទី១៤ ខែតុលា ឆ្នាំ២០១៧ នៅលើផ្លូវជាតិលេខ៤ ចន្លោះគីឡូម៉ែត្រ១១៨-១១៩ ស្ថិតនៅក្នុងភូមិសំរោង ឃុំអូរបាក់រទេះ ស្រុកកំពង់សិលា ខេត្តព្រះសីហនុ។
តាមប្រភពព័ត៌មានពីកន្លែងកើតហេតុបានឲ្យដឹងថា គ្រោះថ្នាក់ចរាចរនេះកើតឡើង រវាង រថយន្តបែនដឹកដីមួយគ្រឿងពណ៍ ខៀវ ពាក់ស្លាកលេខ ភ្នំពេញ3A-3686 បើកបរដោយឈ្មោះយ៉ាង តុលា ភេទប្រុស អាយុ ២២ឆ្នាំ មានទីលំនៅភូមិបត់សិរមាន់ ឃុំព្រៃនប់ ស្រុកព្រៃនប់ ខេត្តព្រះសីហនុ បើកបរមានទិសដៅពីភ្នំពេញឆ្ពោះមកខេត្តព្រះសីហនុ លុះដល់ចំណុចខាងលើក៏បានបុកនឹងរថយន្តដឹកកុងតឺន័រមួយគ្រឿងពណ៍ខៀវ ពាក់ស្លាកលេខ ភ្នំពេញ3A-0257 ជាកម្មសិទ្ធរបស់ក្រុមហ៊ុន អ៊ុយញ៉ុង ដែលមានទិសដៅបញ្រ្ចាស់គ្នា។
ប្រភពដដែលបានបន្តទៀតថា គ្រោះថ្នាក់នេះបណ្ដាលឲ្យព្រូឡានបែនដឹកដីម្នាក់ ឈ្មោះស៊ន សឿន ភេទប្រុស អាយុ ៣៤ឆ្នាំ មានទីលំនៅភូមិបត់សិរមាន់ ឃុំព្រៃនប់ ស្រុកព្រៃនប់ខេត្តព្រះសីហនុ រងរបួសធ្ងន់ត្រូវបានបញ្ជូនជនរងគ្រោះមកពេទ្យមណ្ឌលស្រុកកំពង់សីលា រង់ចាំបងប្អូនមកទទួលនិងបញ្ជួនទៅសង្រ្គោះនៅមន្ទីពេទ្យរាជធានីភ្នំពេញ(ចំណែកអ្នកបើកបររថយន្តបែនដឹកដីពុំមានរងរបួសទេ)។ រីឯអ្នកបើកបររថយន្តកុងតឺន័របានរត់គេចខ្លួនបាត់ក្រោយពេលកើតហេតុ។
បច្ចុប្បន្នវត្ថុតាងរថយន្តទាំងពីរគ្រឿងត្រូវបានសមត្ថកិច្ចយករក្សាទុកនៅអធិការដ្ឋាននគរបាលស្រុកកំពង់សិលារង់ចាំការដោះស្រាយទៅតាមផ្លូវច្បាប់៕ ឆ្លាម សមុទ្រ
