សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ បុរសអ្នកជិះម៉ូតូម្នាក់បានស្លាប់ភ្លាមៗនៅនឹងកន្លែងកើតហេតុ បន្ទាប់ពីរថយន្តមួយគ្រឿងបានបើកបុកម៉ូតូជនរងគ្រោះពេញមួយទំហឹង រួចបន្ថែមល្បឿនរត់គេចបាត់ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៩យប់ ថ្ងៃទី២៥ ខែតុលា ឆ្នាំ២០១៧ នៅលើកំណាត់ផ្លូវជាតិលេខ៥ ក្នុងភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចបានឲ្យភ្នាក់ងារយកព័ត៌មាននគរវត្តដឹងថា ជនរងគ្រោះមានឈ្មោះ មាស ម៉ៅ ភេទប្រុស អាយុ៤២ឆ្នាំ រស់នៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចដដែលបានឲ្យនគរវត្តដឹងទៀតថា នៅមុនពេលកើតហេតុជនរងគ្រោះបានជិះម៉ូតូរបស់ខ្លួន ម៉ាកហុងដា សេ ១២៥ ពាក់ស្លាកលេខ កំពង់ឆ្នាំង ១F-៤៤៩៧ ធ្វើដំណើរក្នុងទិសដៅពីត្បូងទៅជើង នៅពេលមកដល់ចំណុចកើតហេតុ ក៏មានរថយន្តមួយគ្រឿងបើកបរក្នុងដំណើរច្រាស់ទិសគ្នា ក្នុងល្បឿនយ៉ាងលឿន ក៏បានជ្រុលបុកម៉ូតូចំពីមុខពេញមួយទំហឹង បណ្តាលឲ្យជនរងគ្រោះប៉ើងជាច្រើនម៉ែត្រ ស្លាប់ភ្លាមៗនៅកន្លែងកើតហេតុ ។
ប្រភពដដែលបានបន្តប្រាប់នគរវត្តទៀតថា ក្រោយពេលកើតហេតុរថយន្តបង្កបានបើករត់គេចខ្លួនបាត់ស្រមោល ចំណែកជនរងគ្រោះ ត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ។
ចំណែកមធ្យោបាយគ្រោះថ្នាក់ចរាចរណ៍ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុករលាប្អៀរ ៕ ចន្ថា
