សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ប្រធានក្រុមហ៊ុនមជ្ឈមណ្ឌលបណ្ដុះបណ្ដាលភាសាជប៉ុន ស៊ី អិល ជ្រើសរើស បណ្ដុះបណ្ដាល និង បញ្ជូនសិក្ខាកាមទៅកម្មសិក្សានៅប្រទេសជប៉ុន គំរាមនិងធានាថា នឹងរត់ការដោះលែងស្ត្រីល្បីឈ្មោះខាងឆបោកអ្នកដទៃ ឈ្មោះ អៀត សារឹម នៅសាលាឧទ្ធរណ៍ម្តងទៀត ។ ប៉ុន្តែដើមបណ្ដឹង ជឿជាក់ថា ត្រឹមប្រធានក្រុមហ៊ុនរូបនេះ កុំចង់ធ្វើឱ្យជញ្ជីងយុត្តិធម៌នៅកម្ពុជាក្រឡាប់ឱ្យសោះ ដែលផ្ទុយនឹងគោលនយោបាយកំណែទម្រង់ប្រព័ន្ធច្បាប់និងយុត្តិធម៌ របស់រាជរដ្ឋាភិបាលកម្ពុជា ។
ស្ត្រីឆបោកអៀត សារឹម ត្រូវបញ្ជូនទៅឃុំខ្លួនក្នុងពន្ធនាគារខេត្តកណ្ដាល ម្តងទៀត កាលពីថ្ងៃទី២៦ ខែតុលា ក្រោយពីសមត្ថកិច្ចចាប់ខ្លួន តាមដីកាបង្គាប់ឱ្យចាប់ខ្លួនរបស់លោក ហុក វ៉ាន់ធីណា ប្រធានសាលាដំបូងខេត្តកណ្ដាល ក្រោមការចោទប្រកាន់ពីបទ រំលោភលើទំនុកចិត្ត។
លោក ហុក វ៉ាន់ធីណា ប្រធានសាលាដំបូងខេត្តកណ្ដាល និង ជាចៅក្រមជំនុំជម្រះ ប្រកាសសាលក្រមផ្តន្ទាទោសស្ត្រីឈ្មោះ អៀត សារឹម ដាក់ពន្ធនាគារ១ឆ្នាំ សងសំណង ចំនួន ៦ពាន់ដុល្លារអាមេរិក សងសំណងជំងឺចិត្តចំនួន៤ពាន់ដុល្លារ និង ចេញដីកាបង្គាប់ឱ្យចាប់ខ្លួនជនជាប់ចោទ ដើម្បីយកមកអនុវត្តទោសតាមច្បាប់ ។
លោកស្រី សុខ សោភ័ណ្ឌ ជាដើមបណ្ដឹង អះអាងប្រាប់សារព័ត៌មាននគរវត្តថា ពេលសមត្ថកិច្ចចាប់ខ្លួន អៀត សារឹម បញ្ជូនមកស្នងការដ្ឋាននគរបាលខេត្តកណ្ដាល គេឃើញវត្តមានបុរសម្នាក់មិនស្គាល់អត្តសញ្ញាណ តែដឹងត្រឹមជាប្រធានក្រុមហ៊ុនមួយ និយាយគំរាមជាច្រើន និងស្រែកឡូឡា ជុំវិញការចាប់ខ្លួន អៀត សារឹម ។
ប្រធានក្រុមហ៊ុនរូបនេះ គំរាម ដើមបណ្ដឹង ថា ចាំជួបគ្នានៅសាលាឧទ្ធរណ៍ ម្តងទៀត ហើយនឹងធ្វើឱ្យដើមបណ្ដឹង ជាប់គុកម្តង ។ ទង្វើពាលនេះ ត្រូវបានលោកស្រី សុខ សោភ័ណ្ឌ អះអាងថា ពុំមានការខ្លាចញញើតឡើយ ហើយសង្ឃឹមថា សាលាឧទ្ធរណ៍ នៅតែផ្ដល់ភាពយុត្តិធម៌ដល់លោកស្រី ។ លោកស្រី សុខ សោភ័ណ្ឌ សង្កត់ធ្ងន់ថា “ត្រឹមប្រធានក្រុមហ៊ុនរូបនេះ កុំចង់ធ្វើឱ្យជញ្ជីងយុត្តិធម៌នៅកម្ពុជាក្រឡាប់ឱ្យសោះ ដែលផ្ទុយនឹងគោលនយោបាយកំណែទម្រង់ប្រព័ន្ធច្បាប់និងយុត្តិធម៌ របស់រាជរដ្ឋាភិបាលកម្ពុជា “។
ទោះបីយ៉ាងណា នៅថ្ងៃទី២៨ ខែតុលា សារព័ត៌មាននគរវត្តពុំទាន់អាចទាក់ទងសុំការបំភ្លឺបន្ថែមពីប្រធានក្រុមហ៊ុនរូបនោះ ជុំវិញការការចោទប្រកាន់ពីសំណាក់ដើមបណ្ដឹង បាននៅឡើយទេ ៕ចេស្តា
