ទុករថយន្តមុខផ្ទះពេលយប់ព្រឹកឡើងបាត់មិនដឹងចោរលួចតាំងពីពេលណា

ភ្នំពេញ៖ បុរសម្នាក់បានចតរថយន្តទុកមុខផ្ទះ ហើយបានចូលដេកក្នុងផ្ទះបាត់ លុះព្រឹកឡើង ស្រាប់តែត្រូវចោរលួចរថយន្តបាត់មិនដឹងតាំងពីពេលណាបង្កការភ្ញាក់ផ្អើលរត់ទៅប្តឹងសមត្ថកិច្ចកាលពីវេលាម៉ោង៦ព្រឹក ថ្ងៃទី០៦ ខែវិច្ឆិកា ឆ្នាំ២០១៧ នៅភូមិអូរដឹម សង្កាត់ចោមចៅ៣ ខណ្ឌពោធិ៍សែនជ័យ។

ជនរងគ្រោះ ឈ្មោះ ស៊ិន ចាន់ធឿន ភេទប្រុស អាយុ៣២ឆ្នាំ មានទីលំនៅភូមិអូរដឹម សង្កាត់ចោមចៅ៣ ខណ្ឌពោធិសែនជ័យ។

តាមសម្តីជនរងគ្រោះបានឲ្យដឹងដា រថយន្តផ្ទះគាត់មាន២គ្រឿង រាល់ថ្ងៃ រថយន្តមួយគ្រឿងយកចូលទុកក្នុងផ្ទះ សល់មួយគ្រឿងម៉ាក កាមរីបាឡែន ពណ៌ទឹកប្រាក់ សេរី២០០២ ពាក់ស្លាកលេខ ភ្នំពេញ 2I-1755 ចតទុកមុខផ្ទះជារៀងរាល់ថ្ងៃ ហើយចូលដេកសម្រាក បាត់ទៅ រហូតដល់ព្រឹកថ្ងៃទី៦ ខែវិច្ឆិកា ឆ្នាំ២០១៧ ភ្ញាក់ពីដំណេក ចេញមកក្រៅទើបដឹងថា រថយន្តត្រូវបានជនសង្ស័យលួចយកទៅបាត់តែម្តង។

បន្ទាប់មកជនរងគ្រោះបានត្រឹមតែមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅ ដើម្បីឲ្យសមត្ថកិច្ចជួយស្រាវជ្រាវ និងកំណត់មុខសញ្ញា ៕ សុខាសែនជ័យ