សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ នៅព្រឹកថ្ងៃទី២១ ខែវិច្ឆិកា ឆ្នាំ២០១៧នេះ លោកហ៊ូ វតនៈ អភិបាលរង នៃគណៈអភិបាលខេត្ត តំណាងលោកម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញចូលរួមក្នុងពិធីជួបសំណេះសំណាលជាមួយអ្នកវិនិយោគមកពីក្រុងថៃចូវ ខេត្តជៀងស៊ូ សាធារណរដ្ឋប្រជាមានិតចិនគោលបំណងដើម្បីសិក្សាស្វែងយល់អំពីសក្កានុពលនិងស្វែងរកការងារវិនិយោគនៅព្រះរាជាណាចក្រកម្ពុជាក្នុងតំបន់សេដ្ឋកិច្ចពិសេសតាយសេង ក្រុងបាវិត ។
ក្នុងឱកាសនោះដែរ លោកហ៊ូ វតនៈ អភិបាលរង នៃគណៈអភិបាលខេត្ត បានថ្លែងអំណរគុណយ៉ាងជ្រាលជ្រៅ ចំពោះក្រុមហ៊ុនតំបន់សេដ្ឋកិច្ចពិសេសតាយសេង ដែលបានរៀបចំនូវពិធីដ៏មានសារៈសំខាន់នេះឡើង និងបានបង្ហាញពីស្ថានភាព និងសក្ដានុពលសំខាន់ៗរបស់ខេត្តជម្រាបជូនអ្នកវិនិយោគទាំងអស់ដែលបានចូលរួមក្នុងពិធីនេះ ព្រមទាំងបានអំពាវនាវ និងសំណូមពរដល់អ្នកវិនិយោគអញ្ជើញមកវិនិយោគនៅក្នុងខេត្តឲ្យបានកាន់តែច្រើនថែមទៀត ។
លោកក៏បានលើកឡើងថា ប្រទេសជាតិមានសុខសន្តិភាពពេញលេញ ទើបធ្វើអោយមានការអភិវឌ្ឍរីកចម្រើនបានលើគ្រប់វិស័យ ក្រោមការដឹកនាំដ៏ត្រឹមត្រូវរបស់ប្រមុខរាជរដ្ឋាភិបាល ដែលមានសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្សកម្ពុជា។
បច្ចុប្បន្នខេត្តស្វាយរៀងមានតំបន់សេដ្ឋកិច្ចពិសេស១១កន្លែង កំពុងដំណើរការ៧កន្លែង ក្នុងនោះរួមមានតំបន់សេដ្ឋកិច្ចពិសេស តាយសេង, មេនហាតធេន, នាគរាជ, សាន់តុង, ហាយផាក, ជីហ្គា និងតំបន់សេដ្ឋកិច្ចពិសេសលូថៃ និងមានរោងចក្រ សហគ្រាសចំនួន ១៦២កន្លែងក្នុងនោះផ្នែកឧស្សាហកម្មចំនួន៧៣កន្លែង និងមានកម្មករប្រមាណជាង៦ម៉ីននាក់ផងដែរ។
លោកបានបន្ថែមទៀតថា នាពេលថ្មីៗនេះ ខេត្តស្វាយរៀង បានទទួលការវិនិយោគបង្កើតរោងចក្រដំឡើងរថយន្តដែលជាការវិនិយោគរបស់ក្រុមហ៊ុនGreat Mekong Globalលើផ្ទៃដី១១១ហិកតា ក្នុងទុនវិនិយោគ៧៥លានដុល្លាអាមេរិចដែលកំពុងដំណើរការចាក់ដី សាងសង់អាគារ ហើយនិងចាប់ផ្តើមដំណើរឆាប់ៗខាងមុខនេះ។
បន្ទាប់មកអភិបាលរងខេត្តក៏ដូចជាគណៈប្រតិភូចិនបានដើរទស្សនានៅក្នុងតំបន់សេដ្ឋកិច្ចពិសេសតាយសេងដែលមានរោងចក្រ សហគ្រាសជាច្រើន ជាពិសេសមានកន្លែងតំឡើងផ្ទាំងសិលាពន្លឺព្រះអាទិត្យដែលពុំធ្លាប់មាននៅក្នុងទឹកដីខេត្តស្វាយរៀងផងដែរ៕ យឹម សុថាន
