ស្ថានទូតអាមេរិកសូមប្រកាសអញ្ជើញការដាក់ពាក្យសុំថវិកាពីមូលនិធិឯកអគ្គរដ្ឋទូតសំរាប់ការអភិរក្សវប្បធម៌ ឆ្នាំ ២០១៨

ភ្នំពេញ៖ ស្ថានទូតអាមេរិកនៅរាជធានីភ្នំពេញមានសេចក្តីរីករាយសូមប្រកាសអញ្ជើញការដាក់ពាក្យសុំថវិកាពីកម្មវិធីជំនួយថវិកាខ្នាតធំ និងខ្នាតតូចរបស់មូលនិធិឯកអគ្គរដ្ឋទូតសំរាប់ការអភិរក្សវប្បធម៌(AFCP)សំរាប់ឆ្នាំ ២០១៨។ អង្គការមិនធ្វើពាណិជ្ជកម្ម ដែលមានលក្ខណៈសម្បត្តិគ្រប់គ្រាន់ អាចដាក់ពាក្យសុំបាន។ កាលបរិច្ឆេទចុងក្រោយដែលស្ថានទទួលពាក្យសុំគឺថ្ងៃទី ៣១ ខែធ្នូ ឆ្នាំ ២០១៧។ ព័ត៌មានពេញលេញមាននៅក្នុងគេហទំព័រនេះ https://kh.usembassy.gov/education-culture/grant-programs/ambassadors-fund-for-cultural-preservation/ ។

មូលនិធិ AFCP ត្រូវបានបង្កើតឡើងនៅឆ្នាំ ២០០០ ដោយសភាសហរដ្ឋអាមេរិក ដើម្បីជួយអភិរក្សបេតិកភណ្ឌវប្បធម៌រូបី និងបេតិកភណ្ឌវប្បធម៌អរូបី ដែលប្រឈមនឹងការបាត់បង់ នៅក្នុងប្រទេសដែលមានការអភិវឌ្ឍតិច រួមទាំងប្រទេសកម្ពុជាផងដែរ។ កម្មវិធីនេះត្រូវបានគ្រប់គ្រងដោយមជ្ឈមណ្ឌលបេតិកភណ្ឌវប្បធម៌ក្រោមការិយាល័យកិច្ចការអប់រំ និងវប្បធម៌របស់ក្រសួងការបរទេសសហរដ្ឋអាមេរិក។

សហរដ្ឋអាមេរិកមានមោទនភាពក្នុងការជួយដល់ការខិតខំរបស់ប្រទេសកម្ពុជា នៅក្នុងការការពារ ចងក្រងឯកសារ និងបង្ហាញចេញនូវបេតិកភណ្ឌវប្បធម៌ដ៏ល្អឯករបស់ខ្លួន។នៅក្នុងរយៈពេល ១៦ ឆ្នាំកន្លងមកនេះ រដ្ឋាភិបាលសហរដ្ឋអាមេរិកបានចំណាយថវិកាអស់ចំនួនជាង ៤ លានដុល្លាអាមេរិកលើកម្មវិធីបេតិកភណ្ឌ វប្បធម៌នានា រាប់ពីការចងក្រងឯកសារស្តីពីការរាំរបាំបូរាណ ដល់ការប្រយុទ្ធប្រឆាំងនឹងការលួចប្លន់ និងដល់ ការងារអភិរក្សទីតាំងប្រវត្តិសាស្រ្ត ដូចជានៅប្រាសាទភ្នំបាក់ខែងនៅអង្គរវត្តជាដើម។

តាំងពីឆ្នាំ ២០០១ មក ប្រទេសកម្ពុជាបានទទួលអំណោយថវិកាចំនួន ២០ ពីមូលនិធិ AFCP ដោយគិតជាទឹកប្រាក់សរុបជាង៣,៣លានដុល្លាអាមេរិក។ កម្មវិធីធំជាងគេមួយនៅក្នុងប្រវត្តិរបស់មូលនិធិ AFCP គឺអំណោយថវិកាចំនួន ៩៧៩ ០០០ដុល្លា ដែលត្រូវបានផ្តល់អោយនៅឆ្នាំ ២០០៨ សំរាប់បន្តការងារដែលកំពុងដំណើរការនៅប្រាសាទភ្នំបាក់ខែងដោយអង្គការមូលនិធិប្រាសាទពិភពលោក (World Monuments Fund) ដោយធ្វើសហប្រតិបត្តិការជាមួយអាជ្ញាធរអប្សារា៕