សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការភ្ញាក់ផ្អើលដល់អ្នកភូមិ ក៏ដូចជាក្មេងឃ្វាលក្របី ខណៈប្រទះឃើញសពអណ្ដែតទឹក និងរាយការណ៏មកសមត្ថកិច្ចមូលដ្ឋានកាលពីវេលាម៉ោង៦ និង៥០នាទី ព្រឹកនៅថ្ងៃទី៣ ខែធ្នូ ឆ្នាំ២០១៧ នៅចំណុចខាងកើតស្ពានបូម ប្រហែល១គីឡូម៉ែត្រ ខាងត្បូងផ្លូវជាតិលេខ១ ចម្ងាយប្រហែល២៥០ម៉ែត្រ ស្ថិតក្នុងភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង។
យោងតាមសមត្ថកិច្ចនគរបាលក្រុងបាវិតបានប្រាប់នគរវត្តថា ក្រោយពីទទួលបានព័ត៌មានភ្លាម លោកវរសេនីយ៍ត្រី កៅ ហ៊ន អធិការ រងនៃអធិការដ្ឋាននគរបាលក្រុងបាវិតបានដឹកនាំកំលាំងចុះទៅដល់កន្លែងកើតហេតុឃើញថា មានមនុស្សលង់ទឹកស្លាប់នៅក្នុងទឹកប្រឡាយពិត ប្រាកដមែនដោយ ជនរងគ្រោះជាសាកសពភេទប្រុស អាយុប្រហែល៥០ឆ្នាំ ជាងពាក់អាវយឺតពណ៌ស មិនស្គាល់អត្តសញ្ញាណ។
ប្រជាពលរដ្ឋដែលរស់នៅក្បែរៗនោះបានបញ្ជាក់ប្រាប់សមត្ថកិច្ចថាមុនប្រទះឃើញស្លាប់ក្នុងប្រឡាយទឹក គឺបុរសខាងលើជាមនុស្សវិកលចរិកបានដើរមកនៅទីនេះប្រហែលជាង១០ថ្ងៃហើយ ហើយខណៈបងប្អូនប្រជាពលរដ្ឋដែលមានទៅលំនៅឋានក្បែរនោះ បានយកបាយមកឲ្យគាត់ហូបជារៀងរាល់ថ្ងៃផងដែរ។
ក្រោយពីគណ:កម្មការត្រួតពិនិត្យធ្វើកោសល្យវិច្ចយរួចមក បានបញ្ជាក់ ឲ្យឃើញថា ជនរងគ្រោះស្លាប់ដោយសារលង់ទឹកពិតប្រាកដមែន ។
បច្ចុប្បន្នសាកសពត្រូវបានគណ:កម្មការសម្រេចកប់បណ្តោះអាសន្ននៅលើភ្លឺប្រឡាយកន្លែងកើតហេតុដើម្បីស្រាវជ្រាវរកក្រុមគ្រួសារមកទទួលយកទៅធ្វើបុណ្យតាមប្រពៃណី ៕ យឹម សុថាន
