សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖យុវជនក្មេងទំនើង២នាក់ ត្រូវបានកម្លាំងនគរបាលឃាត់ខ្លួន បន្ទាប់ពីស្ទាក់វាយយុវជនមួយក្រុមក្រោយពីចេញពីរាំលេងកម្សាន្តកន្លែងតាំងពិព័រណ៌ខ្មែរ ថៃនៅក្នុងដីឡូមួយកន្លែងតាមបណ្តោយផ្លូវវេងស្រេង ភូមិចោមចៅ សង្កាត់ចោមចៅ២ ខណ្ឌពោធិ៍សែនជ័យ កាលវេលាម៉ោង១០និង៣០នាទីយប់ ថ្ងៃទី៣ ខែធ្នូ ឆ្នាំ២០១៧ ព្រោះតែឃើញយុវជនទាំងនោះរាំឌឺ។
ចំណែកឯជនរងគ្រោះមានគ្នា៤នាក់ ជិះម៉ូតូ២គ្រឿង ទី១-ម៉ាកស៊ុយសូគីលេក ពណ៌សលាយក្រហម ពាក់ស្លាកលេខភ្នំពេញ 1DD, 5841 និងម៉ូតូមួយគ្រឿងទៀតម៉ាកឌ្រីសងសេរ៊ី២០១៧ ពណ៌ខ្មៅពាក់ស្លាកលេខ1GA-7416។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុជនរងគ្រោះបាននាំគ្នាមកមើល គេតាំង ពិពណ៌ផលិតផលខ្មែរថៃ នៅដីវាលភូមិខាងលើ និងមានក្លិបកម្សាន្តរាំលែង ដោយទិញសំបុត្រសម្រាប់ចូលរាំ ហើយពួកគាត់មានគ្នា៤នាក់ ចូលមករាំតែនៅក្នុងក្លិបអាចម៍គោ ខាងលើ ពេញចង្អៀតពេក ចូលមិនចុះ ក៏នាំគ្នាទាំង៤នាក់ខាងលើ រាំខាងក្រៅក្លិបយ៉ាងសប្បាយ ដោយមិនអស់លុយផង ខណៈដែលរាំៗ ស្រាប់តែឃើញពួកជនបង្កខាងលើ បានឈរនៅក្បែរ នៅខាងក្រៅ ក្លិបមានគ្នាប្រមាណ៥ទៅ៦នាក់បានឈរឌឺដង ដាក់ពួកគាត់ តែមិនបានវាយគ្នាឡើយ។
លុះកម្មវិធីបានចប់ យុវជន និងយុវនារីទាំងឡាយ បាននាំគ្នាចេញ បន្ទាប់មក ភាគីរងគ្រោះខាងលើបានជិះម៉ូតូចេញមកក្រៅ ស្រាប់តែភាគីបង្កខាងលើ បាននាំគ្នាលោតធាក់ម៉ូតូពួកគាត់ដែលកំពុងបើកចេញ បណ្តាល ឲ្យ ឌួលហើយភាគីបង្កបាននាំគ្នាដេញវាយ ភាគីរងគ្រោះបណ្តាល ឲ្យត្រូវ ២ទៅ៣ដៃម្នាក់ៗរងរបួសស្រាល រីឯម៉ូតូខូចខាតស្តប់ខាងមុខ បន្ទាប់មក កម្លាំងនគរបាលប៉ុសិ៍្តចោមចៅ២ឃាត់បាន២នាក់ភ្លាមៗផងដែរ។
តាមប្រភពព័ត៌មានពី កម្លាំងនគរបាលប៉ុស្តិ៍ចោមចៅ២បាន ឲ្យដឹងថា នៅមុនពេលកើតហេតុ មានករណីហិង្សាម្តងរួចមកហើយៗ ក៏មានយុវជនម្នាក់រងរបួសធ្ងន់ ត្រូវរថយន្តសង្គ្រោះមន្ទីរពេទ្យឯកជនជិតកន្លែងកើតហេតុដឹកបញ្ជូនទៅមន្ទីរពេទ្យកាល់ម៉ែតរួចមកហើយ ទើបពួកគាត់នៅកន្លែងកើតហេតុឃាត់ជនបង្កក្រោយពេលដេញវាយគ្នានៅតាមផ្លូវ ដូចហ្វូងគោថែមទាំងឃាត់ជនបង្ក២នាក់ភ្លាមៗផងដែរ។
ក្រោយពេលកើតហេតុជនបង្ក២នាក់ត្រូវកម្លាំងនគរបាលប៉ុស្តិ៍ចោមចៅ២ យកទៅភ្លាមៗផងដែរ។ បន្ទាប់មកភាគីរងគ្រោះទាំង៤នាក់មិនបានប្ដឹងគ្រាន់តែ ឲ្យភាគីបង្កសងថ្លៃជួសជុលម៉ូតូដែលខូចខាតចំនួន១០០ដុល្លារ និងឲ្យសមត្ថកិច្ចអប់រំហៅអាណាព្យាបាល ឲ្យមកធ្វើកិច្ចសន្យា ឲ្យត្រឡប់ទៅវិញ៕ សុខាសែនជ័យ
